Órkenıetten qol úzgen: Ulytaý oblysyndaǵy aýylda jol, dúken, mektep joq

ULYTAÝ. QazAqparat – Ulytaý oblysy Aqtas aýylynyń turǵyndary erigen qar sýy joldardy shaıyp ketkenin aıtyp, dabyl qaǵýda. Jergilikti turǵyndar qaladan azyq-túlik ákelý úshin aýyr kóliktiń bortyna minip, ózenmen ótedi, dep habarlaıdy QazAqparat tilshisi.

Azyq-túlik alý úshin Aqtas turǵyndary aýyldan júk kóligimen ǵana shyǵa alady. Ár saparǵa shyǵarda táýekelge bel býatynyn aıtyp otyr. Sebebi aǵyn sýdyń astynda qaı jerde shuńqyr bary belgisiz. Alaıda, bul syrtqy álemmen jalǵyz baılanys. Halyq qysta omby qarmen, kóktemde qyzyl sýmen arpalysyp sharshaǵanyn alǵa tartady.

«Men kúzde satyp alǵan barlyq azyq-túligim qystyń ortasynda taýsylyp qaldy. Ol úshin qalaǵa barýymyz kerek. Aýylda dúken joq. Jazda da, qysta da bizde azyq-túlik satylmaıdy. Bárin qaladan ákelemiz. Aıaz ben boranda traktormen nemese júk kóligimen júrýge májbúrmiz. Al kóktemde erigen qar sýy shaıyp ketken dala joldarynda osylaı bolady. Daladaǵy qar túgili, aýyl ishindegi kóshe joldary kúrelmeıdi. Balalar qysta omby qarmen arpalysyp, al kóktemde shalshyq basyp mektepke barady. Ol mekteptiń ózi kórshi aýylda, bizden bir shaqyrym jerde ornalasqan. Kóktemde eki aýyldyń arasynda jyra paıda bolady, sý ózen bolyp aǵyp ketedi. Balalardyń qaýipsizdigi úshin qorqamyz», - deıdi Aqtas aýylynyń turǵyny Aıtjan Jantaev.

Aqtas aýylynda dáriger de joq, jalǵyz dáriger kórshi aýylda turady. Máseleni sheshý úshin ótken jyly bıýdjetten qarajat bólindi. Alaıda jóndeý jumystary orta jolda toqtap qalǵan. Máseleniń jalǵyz sheshimi – aýyldan 20 shaqyrym jerde tas jolǵa sýaǵarlar ornatý. Sol kezde qyzyl sý mundaı mólsherde jınalmaıdy. Ulytaý aýdany ákiminiń orynbasary Aıan Abjamalovtyń aıtýynsha, aýyldar arasyndaǵy shatqalda ótkelder salý qajet.

«Aqtas eldi mekeni men Pıoner aýylynyń arasynda joldyń bolmaýyna baılanysty bıýdjetten qarajat qarastyrylyp, 2022-2023 jyldary saılarǵa 9 jerden ótkelder salynady. Ol qurylys 2023 jyldyń qyrkúıeginde aıaqtalyp, qoldanysqa beriledi», - dedi Ulytaý aýdany ákiminiń orynbasary Aıan Esenǵalıuly.

Aqtas kentiniń irgesi 1957 jyly qalanǵan. Kvartsty barlaıtyn jáne óndiretin kásiporynnyń toqtap turǵanyna biraz ýaqyt boldy. 40 shaqty úı turǵyny ákimdik, kitaphana men 9 synyptyq mektepte jumys istep, kúneltýde. Qazir jergilikti basshylyq buryndary dúrkirep turǵan óndiristi qaıta jandandyratyn ınvestor izdep jatyr eken. Joldardy jóndep, shaǵyn aýyl ekonomıkasyn kóterý mindeti – bolashaq ınvestorǵa júkteletin bolady.