Órkenıetti qoǵamda zorlyq-zombylyq bolmaıdy – sarapshy pikiri

Órkenıetti qoǵamda zorlyq-zombylyq bolmaıdy. Mundaı pikirdi Ákeler odaǵy Qyzylorda oblystyq fılıalynyń tóraǵasy Erjan Eskendir bildirdi, dep habarlaıdy Kazinform.

«Qazirgi kezde jastar otbasyndaǵy, qoǵamdaǵy óziniń mindetin, jaýapkershiligin sezinbeıdi. Er adam jas bolsa da, kári bolsa da jaýapkershiligin bilýi tıis. ol Otanyn, elin, jerin qorǵaý kerek. Toqyraý kezeńi boldy. Sol ýaqytta eldi, jerdi umyttyq. Munyń bárin oı eleginen ótkizetin kez jetti. Ol úshin tarıhymyzdy, ádebıetimizdi bilýge tıispiz. Biz bilimdi, tárbıeni qolǵa alsaq, bári jaqsy bolady. Qazirgi ýaqytta oryn alyp jatqan keleńsizdiktiń bári jumysymyzdyń tómen ekendigin kórsetip otyr», - dedi ol agenttik tilshisine bergen suhbatynda.

Onyń aıtýynsha, tálim-tárbıe ár adamnyń ózinen bastalýy tıis.

«Tárbıeli, bilimdi adamnyń otbasynda, órkenıetti qoǵamda zorlyq-zombylyq bolmaıdy. Eger árkim qara basyn oılaıtyn bolsa, onda zorlyq-zombylyq ta toqtamaıdy. Ol ary qaraı jalǵasa beredi», - dedi Erjan Eskendir.

Aıta keteıik, elordada Ortalyq Azııa óńirinde áıelder men qyzdarǵa qatysty jasalatyn zorlyq-zombylyqtyń aldyn alýǵa er-azamattary jumyldyrý salasyndaǵy ulttyq áleýetti nyǵaıtýǵa baǵyttalǵan óńirlik semınar-trenıng ótip jatyr.