«Órkendeýge qadam basqan óńirde oń ózgeris kóp» - respýblıkalyq basylymdarǵa sholý

***

«Keshe Qazaqstan Respýblıkasynyń Prezıdenti Nursultan Nazarbaev Aqtóbe óńirine jumys saparymen baryp, oblystaǵy ındýstrııalyq-ınnovatsııalyq jobalardyń iske asyrylý barysymen, partııalyq oqýdyń jaı-kúıimen tanysty», dep jazady «Egemen Qazaqstan» gazeti «Órkendeýge qadam basqan óńirde oń ózgeris kóp» degen taqyryppen basylǵan maqalasynda. Óńirdegi birqatar nysandardy aralap, jumys barysymen jiti tanysqan Elbasy «Nur Otan» HDP Joǵary partııa mektebiniń Aqtóbe aımaqtyq ortalyǵyna at basyn tiregen. Kezdesýde sóz alǵan Memleket basshysy «Elmen jáne halyqpen jumys isteý demokratııalyq elde ońaı emes, basqalar qalaı jumys isteý kerek ekenin bilýimiz kerek, jańa saıası tehnologııalardy úırenýimiz qajet. Jalpy, partııada jumys istep júrgen kadrlardyń, onyń ishinde bastaýysh uıymdar tóraǵalarynyń dárejesi bıik bolmasa halyqpen jumys isteý qıyn. Qandaı máselege de halyqtyń múddesinen kelý kerek», depti.

Eger kózi tiri bolǵanda bıylǵy 24 jeltoqsanda Keńes Odaǵynyń Batyry, qazaq halqynyń qaharman uly Baýyrjan Momyshuly 100 jasqa tolǵan bolar edi. Eldiń eldigi men erdiń erligin alty alashtan da ári asyryp maqtanysh eter osy halyqtyq is-sharanyń qam-qareketine búginde batyr ómirge kelgen oblys jurtshylyǵy úlken daıyndyq ústinde. Ol, álbette, aldyn-ala bekitilgen is-sharalar josparyna sáıkes júrgizilýde. Degenmen, halyqta "toıdyń bolǵanynan, boladysy qyzyq" degen sóz bar. Osyǵan oraı «Egemen Qazaqstan» gazeti oqyrman nazaryna oblys ákimi Qanat Aldabergenuly Bozymbaevpen aty ańyzǵa aınalǵan batyr mereıtoıy aldyndaǵy suhbatty usynyp otyr. Ekeýara áńgime «Baýkeń juldyzdy bolǵan kún - halyqtyń juldyzy janǵan kúni» degen taqyryppen berilgen.

«Bıylǵy jyldyń birinshi jartysynda Qazaqstan ekonomıkasy ósýdiń qarymdy qarqynyna qol jetkizdi. Endi eldiń ishki jalpy ónimi 2008 jyldyń basyndaǵy deńgeıine jetýi úshin, syrtqy áserler qazirgideı qolaıly bolyp tura berse, osyǵan deıin Úkimet boljap kelgennen de az ýaqyt kerek eken», dep jazady «Egemen Qazaqstan» gazeti. Statıstıka agenttiginiń jedel málimetterine qaraǵanda, birinshi jartyjyldyqtaǵy ishki jalpy ónimniń kólemi osy kúngi baǵamen 8733,0 mlrd. teńgeni qurady. Bul byltyrǵy jyldyń osy merzimimen salystyrǵanda, naqty ólshemde 8 paıyzdyq ósýdiń bar ekenin kórsetedi. Onyń bulaısha qaryshtap ósýine eki túrli faktor oń áser etse kerek. Olardyń birinshisi salystyrý úshin alynǵan 2009 jylǵy baza negiziniń tómen ekendigi (ótken jylǵy qańtar-maýsym aralyǵynda ІJÓ qulaýy 2,3 %-ǵa deıin baryp edi) bolsa, ekinshisi eksportqa shyǵarylǵan taýar­larǵa degen suranystyń artyp, baǵanyń kóterilip ketýinen izdestiriledi.

***

Qýyrshaqtardy qashan qazaqy keıipke endiremiz dep júrgende, odan da soraqysy shyqty. Biz balalarymyzǵa oıynshyq emes, ý áperip júr ekenbiz. Bul jaıynda «Alash aınasy» gazetiniń búgingi sanynda jaryq kórgen «Kelimsek uıymnyń keseli» degen taqyryptaǵy maqalada keńinen aıtylǵan. Basylymnyń jazýynsha, Ońtústik Qazaqstan oblysy aýmaǵyndaǵy birneshe dúkender men bazarlarda ýlanǵan oıynshyqtardyń saýdaǵa túsip jatqany anyqtalǵan. Prokýratýranyń pármendiligimen memlekettik sanıtarlyq-epıdemıologııalyq qadaǵalaý komıtetiniń OQO boıynsha departamenti oblys aýmaǵyndaǵy saýda núktelerinde satylyp jatqan balalar oıynshyqtarynyń sapasyna tekserý júrgizgen. Tekserýge alynǵan 267 polımer zatynan jasalǵan oıynshyqtardyń 22-sinde qorǵasyn, kadmıı sekildi aýyr metall qospalary (kontsentratsııalary) ruqsat etiletin mólsherden eki esege deıin joǵary bolǵan. Sondaı-aq formaldegıd, fenol sekildi zııandy hımııalyq qospalardyń da quramy kóp ekeni anyqtaldy.

«Qasıet qonǵan, qut daryǵan pir Beket». Osy taqyryppen «Alash aınasy» gazetinde jarııalanǵan maqalada aǵymdaǵy jyly ulystyń urany, bir basyna birneshe qasıet daryǵan pir Beket Atanyń 260 jyldyǵy elimizdiń aımaqtarynda erekshe atalyp ótip jatqandyǵy jaıynda baıandalǵan. Kindik qany Atyraý óńiriniń Jem boıyndaǵy Aqmeshit eldi mekeninde tamǵan Beket Ata Myrzaǵululy - kóripkeldigimen, áýlıeligimen, sáýegeıligimen birge, taryqqandy demep, zaryqqandy jebegen, asa erekshe qasıetimen qosa, sáýlet ónerin damytqan sheberligimen ári batyrlyǵymen elge tanylǵan tarıhı tulǵa. Basylymnyń atap ótýinshe, Beket Atanyń arýaǵyna arnap as berýdegi halyq bastamasyna Mańǵystaý men Atyraý oblystarynyń ákimderi de qoldaý bildirgen. Atyraý óńirinde buryn-sońdy bolmaǵan dúbirli toıǵa kelgen halyq aldynda sóz alǵan oblys ákimi Bergeı Rysqalıev oblysta uıymdastyrǵan osy sharany búkil qazaq qoǵamyn biriktiretin úlken shara dep atap, halyq aldynda QR Memlekettik hatshysy-syrtqy ister mınıstri Qanat Saýdabaevtyń pir Beketti ulyqtaý toıymen quttyqtaǵan hatyn oqyp berdi. Astanadan kelgen zańǵar jazýshy Ábish Kekilbaevtyń ótken tarıhtan sabaqtaǵan keleli oıy Beket Ata toıyna kelgen halyqtyń sanasynda birazǵa deıin jańǵyryp turaryna senimimiz mol.

Osy basylymnyń sport aıdarynda «Qyzdarymyz qajyrly, jigitterimiz jigersiz» degen taqyryppen jaryq kórgen maqala Reseı astanasyndaǵy «Olımpıskıı» sport kesheninde kúres túrlerinen aıaqtalǵan álem chempıonatyna arnalǵan. «Qyzdarymyz qashan da el namysyn abyroımen qorǵap keledi. Bul joly da jalǵyz kúmis medal solardyń enshisinde. 67 keli salmaq dárejesinde beldesken Elena Shalygına kúmispen kúpteldi», dep jazady basylym. Jarııalanymnyń tolyq nusqasyn «Alash aınasy» gazetiniń búgingi sanynan oqı alasyzdar.

***

«Elbasynyń Almatydaǵy rezıdentsııasynda Qazaqstannyń Syrtqy ister mınıstri - Memlekettik hatshy Qanat Saýdabaev bir top zııaly qaýym ókilderimen kezdesti», jdep jazady «Aıqyn» gazeti «El mereıin tasytýǵa erekshe ekpin kerek» degen taqyryppen jaryq kórgen maqalasynda. Jıynda S.Qırabaev, Sh.Eleýkenov, D.Isabekov, M.Áýezov sóz alyp, EQYU sııaqty halyqaralyq uıymǵa Qazaqstannyń tóraǵalyq etýi men jeltoqsandaǵy sammıttiń ótkizilýine qatysty óz oılaryn ortaǵa salǵan. Sonymen qatar qazirgi tańdaǵy qazaq ádebıeti men mádenıeti tóńiregindegi túıtkildi máseleler de áńgime ózegine aınaldy.

«Aıqyn» gazetiniń jazýynsha, keıbir memlekettik qyzmetkerlerdiń qazirgi zamanda ádetke aınalyp bara jatqan paraqorlyqtan, jemqorlyqtan qanshalyqty tartynyp, adal qyzmet etip júrgenin anyqtaý úshin, jalǵan aıtqandy ustap beretin detektor arqyly arnaıy testen ótkizilýi múmkin. Bul bastamany «Nur Otan» HDP qoldaıtyndyǵyn bildirgen. Maqalanyń tolyq nusqasyn basylymnyń seısenbilik sanyndaǵy «Memlekettik sheneýnikterdi «adaldyq detektory» arqyly arnaıy tekserýden ótkizý qajet» degen maqaladan oqı alasyzdar.