Órkendeý bar jerde rýh kóteriledi - respýblıkalyq basylymdarǵa sholý
Ótken jartyjyldyqta kásipkerlerge zańsyz taǵaıyndalǵan myń jarym tekserýge tosqaýyl qoıyldy, dep habarlaıdy «Egemen Qazaqstan» gazeti «Quqyq qorǵaý erekshe nazarda» atty maqalasynda.
Sońǵy 6 aı ishinde kásipkerlerge qatysty 378 zańsyz tekserý anyqtaldy. Soǵan baılanysty 800-den astam adam tártiptik, 147-si ákimshilik jaýapkershilikke tartylǵan. 6 laýazymdy tulǵaǵa qatysty qylmystyq is qozǵaldy. Bul Bas prokýratýranyń alqa májilisinen keltirilgen málimetter.
Elimizdiń Bas prokýrory Ashat Daýylbaevtyń tóraǵalyǵymen ótken jıynda, prokýratýranyń halyqaralyq yntymaqtastyqty nyǵaıtý jónindegi jumystaryna da birsydyrǵy sholý jasalǵan. Máselen, Bas prokýratýra shet memleketter izdestirip jatqan 56 adamdy berý týraly sheshim qabyldaǵan. Al osy ýaqyt aralyǵynda Qazaqstan aýmaǵyna shet elderden 30 adam ekstradıtsııalanǵan.
Sonymen qatar gazettiń búgingi sanynda Eýropanyń fýtbol alańdarynda oınap júrgen jalǵyz qazaq Murat Ónalmen suhbat jarııalanyp otyr. Qazir 24 jasar jigit Gollandııanyń «Volendam» komandasynyń shabýyl shebinde óner kórsetip júr. 17 jasynda jastar arasynda úzdik shabýylshy atanǵan ol, Belgııanyń eń myqty klýbtarynyń biri «Brıýgge» komandasynda oınap úlgergen. Kezinde Qazaqstan quramasynyń buryńǵy bas bapkeri Arno Paıpersten shaqyrtý da alypty. Alaıda ol kezde Qazaqstanǵa joly túspepti.
«Beranekten shaqyrý alsań, quramada oınar ma ediń» degen saýalǵa M. Ónal: «Ár qazaq balasy úshin bul úlken maqtanysh. Árıne, Qazaqstan ulttyq quramasynda oınaǵym keledi!», - dep jaýap qaıyrdy. Gollandııada dop teýip júrgen qazaq jigiti týraly «Qazaqstan quramasynda oınaǵym keledi» degen materıaldan oqı alasyzdar.
«Qazaqstannyń áleýmettik-ekonomıkalyq aqparat jáne boljam ınstıtýtynyń málimetinshe, Soltústik Qazaqstan, Pavlodar, Aqmola oblystarynda aýyl turǵyndary sońǵy on jylda jıyrma paıyzǵa deıin qysqarǵan. Tek Qyzyljarda turǵyndary kóship ketken 59 aýyl kartadan syzylyp tastaldy», - dep jazady «Alash aınasy» búgingi nómirinde.
«Soltústiktiń aýyldary kartadan syzylyp jatyr» atty maqalada aımaqtyń ýrbanızatsııalyq protsesterdiń sebepteri saralanyp, joıylyp bara jatqan aýyldardy saqtap qalý múmkin be degen saýalǵa toqtalady.
«Aıqynnyń» senbidegi nómirinde «Órkendeý bar jerde rýh kóteriledi» atty maqala basyldy. Onda resmı Astana eldiń áleýmettik-ekonomıkalyq damýynyń birinshi jartyjyldyqtaǵy qorytyndysyn shyǵarǵany týraly málim etilgen.
Materıalda atap kórsetilgenindeı, Qazaqstan halqy 0,6 paıyzǵa ósip, 16,5 mln. adamǵa jetken. Al otandyq ónerkásip bıylǵy jartyjyldyqta 7 trıllıon 676,5 mıllıard teńgeniń ónimin óndirgen. Qazaqstandaǵy kásiporyndardyń kapıtalyna 1 trıllıon 869,5 mıllıard teńge ınvestıtsııa quıylypty. Eldiń syrtqy saýda aınalymy 48 mlrd. teńgeden asyp jyǵylǵan.
«Ana tili» aptalyq basylymy «Elbasy jáne memlekettik til» atty jınaqtyń jaryqqa shyqqanyn jarııa etti. Atalmysh kitapty Halyqaralyq «Qazaq tili» qoǵamy men «Memlekettik tildi damytýdyń prezıdenttik qory» birlesip ázirlegen.
«Kitapty shyǵarýdaǵy basty maqsat - Ult Kóshbasshysy N. Nazarbaevtyń memlekettik til saıasatyn qoldaý jolyndaǵy qajyrly eńbegi men iri bastamalaryn bir arnaǵa toǵystrý», - delingen jınaqpen attas «Elbasy jáne memlekettik til» materıalynda.
Qazaqstannyń ǵaryshtyq monıtorıng júıesi álemdegi eń myqty ulttyq júıelerdiń biri, dep habarlaıdy «Kazahstanskaıa pravda» gazeti «Ývıdet ı sreagırovat» dep atalatyn maqalasynda.
Ǵaryshtyq monıtorıng jáne qashyqtyqtan zondtaý júıelerinsiz qazirgi zamanǵy ekonomıkany elestetý múmkin emes shyǵar. Úlken aýmaqty qamtyp, ony basqarýdyń ózi tym qıynǵa túsedi. «Álemde 93 memlekette óz spýtnıgi bar. Alaıda onyń ishinen tek 9 ulttyq ǵaryshtyq baqylaý júıesiniń damý deńgeıi erekshe atap kórsetiledi. Olar Qazaqstan, Brazılııa, AQSh, EO, Avstralııa, Argentına, Reseı, Qytaı, Indııa», - delingen maqalada.
