«Órken» granty - daryndy balalarǵa
ASTANA. 17 qyrkúıek. QazAqparat - Mınıstr Baqytjan Jumaǵulovtyń tóraǵalyǵymen Qazaqstan Respýblıkasy Bilim jáne ǵylym mınıstrliginde Qazaqstan Respýblıkasy Tuńǵysh Prezıdentiniń-Elbasynyń «Órken» bilim berý grantyn taǵaıyndaý jónindegi respýblıkalyq komıssııa otyrysy ótkizildi.
Bul týraly vedomstvonyń baspasóz qyzmeti habarlady.
Respýblıkalyq komıssııa Kókshetaý, Taldyqorǵan, Semeı, Oral qalalaryndaǵy fızıka-matematıkalyq baǵyttaǵy Nazarbaev Zııatkerlik mektepterinde jáne Óskemen qalasyndaǵy hımııa-bıologııalyq baǵyttaǵy Nazarbaev Zııatkerlik mektepterine 7, 8, 9 synyp oqýshylaryn irikteý konkýrsynyń qorytyndysyn shyǵardy.
Konkýrstyq irikteý 2012 jylǵy 16 shilde men 24 shilde aralyǵynda ótkizildi. Qabyldaý komıssııasynyń nátıjesi boıynsha «Órken» grantyn taǵaıyndaý konkýrsyna 827 oqýshy qujat tapsyrdy. Konkýrs nátıjesi boıynsha 370 oqýshy shekteýli baldy jınaǵan.
Komıssııa músheleriniń qaraýyna shekteýli ball alǵan barlyq úmitkerlerdiń materıaldary usynyldy, sonymen qatar, Astana qalasyndaǵy fızıka-matematıkalyq baǵyttaǵy Nazarbaev Zııatkerlik mektebiniń oqý orys jáne qazaq tilinde júretin 7 synyptardyń rezervtik tizimindegi 45 úmitkerdiń jáne Semeı qalasyndaǵy fızıka-matematıkalyq baǵyttaǵy Nazarbaev Zııatkerlik mektebiniń oqý qazaq tilinde júretin 7 synyptyń rezervtik tizimindegi 43 úmitkerdiń qujattary usynyldy.
Respýblıkalyq komıssııa sheshimimen 345 oqýshy «Órken» bilim berý grantynyń ıegeri atalsa, 114 oqýshy rezervtik tizimge endi.
