Órken Azamatulyn qasaqana óltirgenderdiń apellıatsııalyq shaǵymy qaraldy
TALDYQORǴAN. QazAqparat - Almaty oblystyq sotynda 11 jastaǵy Órken Azamatulyn qasaqana óltirgenderdiń apellıatsııalyq shaǵymy qaraldy. Sottalǵandar úkimmen kelispeı qaıta aryzdanǵan bolatyn. Biraq sot alǵashqy úkimdi ózgerissiz qaldyrdy, dep habarlaıdy QazAqparat tilshisi.
Taldyqorǵanda ótken sot otyrysyna Órken Azamatulynyń anasy Aıjan Qydyrmoldanova men apasy keldi. Al sottalýshylar tarapynan birde-bir adam tóbe kórsetpedi. Tek olardy aqtap shyǵýǵa úmittengen qorǵaýshylar ǵana júrdi. Jábirlenýshi tarap ózgerissiz qalǵan úkimmen kelisemiz dep otyr.
«Ulymdy qasaqana, azaptap óltirgender ómir boıy temir torǵa qamalsa dep edim. Biraq, zań boıynsha oǵan múmkindik joq eken. Sondyqtan apellıatsııalyq sottyń sheshimimen kelisem», deıdi Órkenniń anasy.
Esterińizge sala keteıik, 26 mamyrda Órken Azamatulyn óltirgen bes adam sottalǵan bolatyn. 11 jastaǵy balany óltirýge tapsyrys bergen Órkenniń ógeı sheshesi Shárıpa Aqberdıeva- 25, uly Temir Aqberdıev - 23, qyzy Aıdana Aqberdıeva - 16 jylǵa sottaldy. Al Kadyrjan Gýlıamov 12 jylǵa, Rýslan Mýtalıev 17 jylǵa bas bostandyǵynan aıyryldy. Balany býyndyryp, pyshaqtap óltirgender 21 qańtarda qolǵa tústi. Al Órken Azamatulynyń joǵalǵandyǵy jóninde 19 qańtar kúni apasy polıtsııaǵa habarlaǵan edi. Balanyń denesi Almatydaǵy Naýryzbaı aýdanyndaǵy saıajaılardyń birinen tabyldy.
