«Órken» AQ qyzmetkerleri qyzylaǵashtyq azamattarǵa kómek qoryna birkúndik eńbekaqylaryn aýdardy
ASTANA. Naýryzdyń 18-i. QazAqparat - Búgin «Órken» AQ ujymynyń qyzmetkerleri Almaty oblysyndaǵy sý tasqynynan zardap shekken azamattarǵa kómek qoryna birkúndik eńbekaqylaryn aýdarý týraly sheshim qabyldady.
Bul aqparatty atalǵan mekemeniń baspasóz qyzmeti taratyp otyr.
«Almaty oblysynda oryn alǵan qaıǵyly oqıǵany árbirimiz sezingen shyǵarmyz. Sý tasqynynan úılerdiń qıraýy, birneshe ondaǵan adamnyń, ásirese balalardyń qaza bolýy týraly habar eshkimdi beıjaı qaldyrmady. «Órken» AQ ujymynyń qyzmetkerleri Almaty oblysyndaǵy sý tasqynynan zardap shekken azamattarǵa kómek qoryna birkúndik eńbekaqylaryn aýdarý týraly sheshimdi biraýyzdan qabyldady», delingen baspasóz baıanynda.
Sonymen qatar baspasóz qyzmetiniń taratqan aqparatyna sáıkes, Astana, Semeı jáne Kóshetaý qalalaryndaǵy Tuńǵysh Prezıdenttiń ıntellektýaldy mektepteriniń ujymdary da birkúndik eńbekaqylaryn aýdarýǵa daıyn ekendigin jetkizgen. Uıymǵa qarasty mekemelerdi qosqanda qyzmetkerler sany 407 adamdy quraıdy.
«Bul qarajat kóp emes, degenmen bul bizdiń apattan zardap shekkender úshin kómegimiz. Biz sizderdiń qaıǵylaryńyzdy bólisemiz, sizderdiń qaıǵy-qasiretterińiz bizge túsinikti. Bekem bolyńyzdar! Sizderge kúsh-qaırat tileımiz!», delingen habarlamada.
