Orys synyptaryn qazaq tilinen emtıhan tapsyrýǵa mindetteý oqýshylarǵa ne berdi – Ǵanı Beısembaevtyń jaýaby

ASTANA. KAZINFORM – Oqý-aǵartý mınıstri Ǵanı Beısembaev Úkimet otyrysynan keıin ótken baspasóz máslıhatynda orys synyptaryn qazaq tilinen emtıhan tapsyrýǵa mindetteý oqýshylarǵa ne bergenin aıtty.

- Ótken jyldyń taldaýy qazaq tiline degen qyzyǵýshylyq artqanyn kórsetti. Bul birinshi kezekte atalmysh pándi oqytýdyń jaýapkershiligin kóterip otyr. Alǵashqy oń nátıjeler de bar.

Emtıhannyń basty maqsaty – qyzyǵýshylyq pen úlgerim dep oılaımyn. Bul emtıhandar jalǵasa beredi, - dedi mınıstr. 

Onyń aıtýynsha, bul emtıhannyń bilim sapasyna qalaı áser etetinin naqty anyqtaý úshin biraz ýaqyt kerek. 

- Bıylǵy emtıhandardyń qorytyndysyn kórýimiz kerek. Bálkim 2-3 jyl ótkennen keıin durys taldaý jasalyp, túbegeıli sheshim qabyldaıtyn shyǵarmyz, - dedi Ǵanı Beısembaev.

Mınıstrliktiń resmı deregine súıensek, bıyl 1,7 mln oqýshy qazaq tili men ádebıetinen emtıhan tapsyrady.