Orynsyz shyǵyndy toqtatý kerek - Prezıdent
ASTANA. KAZINFORM — Úkimet el ekonomıkasyn turalap qalýdan saqtap, ornyqty damýdy qamtamasyz etý úshin kúrdeli sheshimder qabyldaýy kerek. Bul týraly Úkimettiń keńeıtilgen otyrysynda Prezıdent Qasym-Jomart Toqaev málim etti.
- Men reformalardyń naqty baǵyty men ony júzege asyrý joldary týraly osyǵan deıin de aıttym. Úkimet el ekonomıkasyn turalap qalýdan saqtap, ornyqty damýdy qamtamasyz etý úshin kúrdeli sheshimder qabyldaýy kerek jáne eń bastysy sol sheshimderdi iske asyrýǵa tıis. Bul – joǵary bilikti ári jaýapkershilik alýǵa daıyn memlekettik qyzmetshilerdiń qolynan keletin jumys. Álemdik tájirıbege qarasaq, memlekettik apparattyń tıimdiligi osyndaı kúrdeli kezeńderde aıqyn kórinedi, - dedi Qasym-Jomart Toqaev.
Prezıdenttiń aıtýynsha, Úkimet qanshalyqty qıyn bolsa da, jappaı únemdeýge kóship, bıýdjet qarjysyn tek qana asa ózekti máselelerdi sheshýge jumsaýy kerek.
- Kórpege qaraı kósiletin ýaqyt keldi. Orynsyz shyǵyndy toqtatyp, aıaǵymyzdy tartyp basý qajet, - dedi Memleket basshysy.
Budan buryn habarlanǵandaı, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
Memleket basshysy 2024 jyldy elimiz oń kórsetkishtermen aıaqtaǵanyn aıtty.