Oryndyqqa baılap, urǵan: polıtsııa balabaqshadaǵy jaǵdaıǵa qatysty qylmystyq is qozǵady
ASTANA. KAZINFORM — Áleýmettik jelide elordadaǵy balabaqshalardyń birinde bolǵan keleńsiz jaıtqa qatysty jazba tarap jatyr. Astana Polıtsııa departamenti bul jaǵdaıǵa baılanysty málimdeme jasady.
Threads jelisindegi jarııalanymǵa sensek, balabaqsha qyzmetkeri búldirshinderdi oryndyqqa baılap, basynan tápishkemen urǵan.
— Myna jaǵdaıdan keıin balalarymyzdy qalaı senip tapsyramyz. Shydamy jetpese, istemesin. Basqa jumys qarastyrsyn. Ata-analar senip, perzentin damytý úshin aqsha tólep, berip otyr ǵoı, — dep shamdandy jarııalanym avtory.
Al Polıtsııa departamenti kámeletke tolmaǵandardy tárbıeleý jónindegi mindetterdi oryndamaý faktisi boıynsha qylmystyq is qozǵalǵanyn habarlady.
— Beınejazbanyń 2025 jylǵy qazan aıynda túsirilgeni anyqtaldy. Polıtsııa qyzmetkerleri túzetý baǵytyndaǵy balabaqshada tárbıeshiniń kómekshisi bolyp jumys istegen áıeldiń jeke basyn anyqtady. Ol polıtsııa basqarmasyna jetkizildi. Qazirgi ýaqytta zardap shekken balalardyń ata-analary anyqtaldy. Oqıǵanyń barlyq mán-jaıyn jan-jaqty ári obektıvti anyqtaýǵa baǵyttalǵan tergeý amaldary júrgizilýde, — delingen habarlamada.
Aıta keteıik, buǵan deıin depýtat balany balabaqshaǵa tirkeýdegi kemshilikti ataǵanyn jazǵanbyz.
