Orynborda Irekliden Jaıyqqa sý mol kólemde jiberilip jatqany ras pa

ORAL. KAZINFORM – Orynbor oblysynda Irekli qoımasynan Jaıyq ózenine 15 qańtardan bastap sekýndyna 90 tekshe metr sý jiberile bastady.

Osyǵan deıin Jaıyqqa sekýndyna 60 tekshe metr sý jiberilip kelgen bolatyn. Áleýmettik jelide qańtar aıynda sekýndyna 90 tekshe metr sýdyń jiberilýi sońǵy 40 jylda bolmaǵany jóninde aqparat tarady.

- Munyń sebebi – Jaıyq ózeni basseınindegi qar kólemi normadan 180-220 paıyzǵa joǵary. Sondaı-aq naýryz aıynda aýa raıy 7-8 gradýsqa jyly bolady dep boljanyp otyr. Sol sebepti Orsk, Orynbor, Sol-Iletsk, Qýandyq tusynda jaǵalaýdaǵy aýmaqtardy sý basý qaýpi tónýi yqtımal, - delingen onda.

Kazinform tilshisiniń saýalyna oraı «Qazsýshar» RMK Batys Qazaqstan fılıalynyń dırektory mindetin atqarýshy Raýan Husaıynovtyń málim etkenindeı, Tómengi Edil basseındik sý basqarmasy Orynbor oblysy boıynsha sý resýrstary bóliminiń málimetine qaraǵanda, aqpan aıynyń basynda aldyn ala boljam shyǵady. Soǵan deıin osyndaı jumys rejımi saqtalady.

«Qazgıdromet» RMK BQO fılıalynyń dırektory Tilegen Shapanov atalmysh máselege baılanysty reseılik áriptesterimen únemi baılanys ustap otyrǵanyn jetkizdi. Olardyń sózine qaraǵanda, kórshiles Orynbor oblysynda jaǵdaı qalypty.

- Naqty boljam aldaǵy aqpan aıynda belgili bolady. Qazirgi tańda «Qazgıdromet» RMK qyzmetkerleri BQO TJ departamentimen birge oblystaǵy kóktemgi sý tasýǵa beıim ózenderiniń basseınderinde qar jamylǵysynyń bıiktigin, tyǵyzdyǵyn anyqtaý boıynsha marshrýttyq tekserister júrgizdi. Onyń qorytyndylary keıin beriledi, - dedi T.Shapanov.

Eske sala keteıik, budan buryn Orynbor oblysyndaǵy Irekli qoımasynan úlken kólemde sý jiberilmeýi múmkin ekendigin jazǵan bolatynbyz.

Sondaı-aq BQO-da sýmen tıimdi qamtamasyz etý baǵytynda birneshe joba qolǵa alyndy.