Orynborda Irekli sý qoımasynan Jaıyqqa sekýndyna 141 tekshe metr sý jiberilip jatyr
ORAL. KAZINFORM — Jyl basynan beri Jaıyq ózenindegi naqty aǵyn kólemi 4,1 mlrd tekshe metrden asty.
Sý resýrstaryn qorǵaý jáne paıdalanýdy retteý jónindegi Jaıyq-Kaspıı basseındik sý ınspektsııasynyń basshysy Ǵalıdolla Azıdýllınniń óńirlik kommýnıkatsııalar qyzmeti alańynda ótken brıfıngte málim etkenindeı, qazirgi tańda Reseıdiń Orynbor oblysyndaǵy Irekli sý qoımasynan Jaıyqqa sekýndyna 141 tekshe metr sý jiberilip jatyr.
Onyń sózine qaraǵanda, kelissózder nátıjesinde Irekliden jiberiletin sý 90 tekshe metr-sekýndtan osynshama kólemge ulǵaıtyldy.
— Bıylǵy 11 tamyzdaǵy málimet boıynsha Báıterek aýdany ıAnvartsev aýylyndaǵy gıdrobekettegi Jaıyqtaǵy sý deńgeıi 209 sm, sý shyǵyny 238 tekshe metr-sekýnd (ótken jyly osy merzimde 172 sm, 168 tekshe metr-sekýnd) boldy. Oral qalasy tusynda sý deńgeıi 138 sm (ótken jyly — 99 sm), Kóshimde 169 sm, sý shyǵyny 214 tekshe metr-sekýndty (2025 jyly — 138 sm, sý shyǵyny — 173 tekshe metr-sekýnd) kórsetti, — deıdi Ǵ.Azıdýllın.
Inspektsııa basshysynyń aıtýynsha, kúni búgin Oral-Kóshim sýarý-sýlandyrý júıesine 24,4 tekshe metr-sekýnd sý aǵyny túsýde (kópjyldyq ortasha aǵyn — 13 tekshe metr-sekýnd). Sý qoımalarynyń jalpy kólemi 260,3 mln tekshe metr bolsa, olar 163,27 mln tekshe metrge nemese 62,72 paıyzǵa toltyrylǵan.
Búgingi tańda «Qazsýshar» RMK-nyń Jaıyq-Kóshim sýarý-sýlandyrý júıesi boıynsha vegetatsııalyq kezeńde sý tutynýshylarmen 184 shart jasaldy.
— Bıyl Reseı Federatsııasy aýmaǵynan Edil ózeniniń sýyn tasymaldaý shyǵynyn óteýge 3 mlrd 707 mln teńge bólindi. Osy qarajatqa 68,5 mln tekshe metr Edil sýyn berýge shart jasaldy. Osynyń 42,1 mln tekshe metri Qaraózen men Saryózen, 26,4 mln tekshe metri Jánibek sýarý-sýlandyrý júıesi arqyly keledi. Budan bólek, Edil ózeninen Qaraózen men Saryózenge, sondaı-aq Jánibek sýarý-sýlandyrý júıesine 100-120 mln tekshe metr sý berýge jumsalatyn shyǵyndardy óteýge jyl saıyn respýblıkalyq bıýdjetten qarajat qarastyrylady. Bul transshekaralyq sý resýrstaryn tıimdi paıdalanýdy jáne óńirdiń sý qaýipsizdigin qamtamasyz etýdi kózdeıtin memlekettik qoldaýdyń mańyzdy tetigi bolyp esepteledi, — dedi Ǵ.Azıdýllın.
Inspektsııa málimetine sáıkes Qaraózen men Saryózenge 13 mamyrdan bastap sý berilip jatyr. Osy kezge deıin Qaraózenge 15,2911 mln tekshe metr, Saryózenge 14,583 mln tekshe metr sý jiberildi. Qazirgi tańda Qaraózenge sekýndyna 3 tekshe metr, Saryózenge 3,5 tekshe metrden sý bosatylǵan. Oǵan qosa Volgograd oblysy Pallasov sýarý-sýlandyrý júıesinen Jánibek sýarý-sýlandyrý júıesine 15,990 mln tekshe metr Edil sýy alyndy.
Eske sala keteıik, budan buryn Qazaqstanda sý únemdeýdiń ózekti máselelerin qalaı sheshýge bolatynyn jazǵan edik.
