Orynborda 12 myń úı sý astynda qaldy, 7 myńǵa jýyq adam evakýatsııalandy
ASTANA. KAZINFORM — Orynborǵa Tótenshe jaǵdaılar mınıstrliginiń ushaǵymen sý tasqynynan qorǵaýǵa arnalǵan sý toltyrǵysh bógetter jetkizildi, dep jazady TASS.
«Tasqyn sýyn azaıtý, turǵyn úıler men sharýashylyq qurylystaryn sý tasqynynan qorǵaý úshin Reseı TJM-niń Il-76 ushaǵy Orynborǵa sý quıatyn bógetter jetkizdi», — dep habarlady Reseı TJM.
Jetkizilgen bógetterdiń jalpy uzyndyǵy — 3 km.
Sý toltyratyn bógetter — kompozıttik plastık materıaldardan jasalǵan qalyń shlangtan turady. Ony tez ornatýǵa nemese jyljytýǵa bolady.
Orynbor oblysynda 12 myńnan astam úı men 14 myńnan astam sharýashylyq telimi sý astynda qaldy. 6,9 myń adam evakýatsııalandy.
Aımaqta federaldy tótenshe jaǵdaı jarııalandy.
Sońǵy málimetter boıynsha Orynbor mańyndaǵy Jaıyq ózenindegi sý deńgeıi 1000 sm-ge jetti, dep habarlady TASS agenttigine qala ákimdigi.
Bul kórsetkish qaýipti mánnen 70 sm joǵary.
