Orynbor zaýyty qaıtadan Qazaqstan gazyn qabyldaı bastady
ASTANA. KAZINFORM — Qarashyǵanaq ken ornyndaǵy óndiristik protsester kezeń-kezeńimen qalpyna keltirilip jatyr. Bul týraly Energetıka mınıstrliginiń baspasóz qyzmeti habarlady.
— Orynbor gaz óńdeý zaýyty qazaqstandyq ken ornynan shıki gaz qabyldaýdy qaıta bastady. Osyǵan baılanysty jobanyń operatory 19 qazandaǵy oqıǵaǵa deıingi shtattyq deńgeıge jetý úshin gaz óndirý kólemin birtindep arttyryp jatyr.
Shıkizat qabyldaýdyń ýaqytsha toqtatylýy men óndirýdiń qysqartylýy eldiń ishki naryǵyn gazben qamtýǵa keri áser etpedi. Qazaqstandyq tutynýshylar aldyndaǵy barlyq mindettemeler tolyq oryndaldy jáne oryndalýyn jalǵastyryp jatyr, — delingen mınıstrlik habarlamasynda.
Sondaı-aq, Qarashyǵanaqta otandyq gaz óńdeý zaýytyn salý strategııalyq mańyzǵa ıe joba retinde belgilengen.
Bul jobany «QazMunaıGaz» ulttyq kompanııasy júzege asyratyn bolady. Qazirgi ýaqytta zaýytty ken ornynyń qoldanystaǵy ınfraqurylymyna qosý boıynsha tehnıkalyq parametrler kelisilip jatyr.
Atalǵan jaǵdaı Qazaqstan Respýblıkasy Úkimetiniń tolyq baqylaýynda.
Aıta ketelik 19 qazanda Orynbor gaz óńdeý zaýytyna ushqyshsyz áýe apparatynyń shabýyly saldarynan apatty jaǵdaı tirkelgen edi.