Orhon eskertkishiniń tolyq atlasy jaryq kórdi
21 aqpanda Ulttyq akademııalyq kitaphanada tarıh ǵylymdarynyń doktory, professor Qarjaýbaı Sartqojaulynyń «Orhon eskertkishteriniń tolyq atlasy» atty kitabynyń tusaýkeseri ótedi. Basylym úsh tomnan turady.
Atlasta Eýrazııa Uly dalasyna úsh ǵasyr boıy bılik júrgizgen, ózderiniń tarıhyn, dúnıetanymyn, danalyǵyn, oı-sanasyn, bolmysyn, jazý ónerin, el basqarý júıesin, ata dástúrin óshpesteı etip tasqa qashap ketken, órkenıetke, adamzat mádenıetine asyl qazyna qosqan baıyrǵy túrikterdiń muralary túgel qamtylǵan.
Altaı, Orhon, Seleńgi, Kerýlen boıynan tabylǵan Kók túrik ımperııasy dáýirindegi (500-900 jj) tas ustynǵa 2000 jyl buryn qashap jazǵan túpnusqada tarıh, til ádebıet (sóz óneri), sóz aspaby, baıyrǵy arhıtektýra jáne fılosofııasy men salt-dástúrleriniń muralary qamtylǵan.
Atlasta Mońǵolııa-Chehııa, Mońǵolııa-Túrkııa (TIKA), Mońǵolııa-SSSR birikken ekspedıtsııalarynyń, L.N. Gýmılev atyndaǵy Eýrazııa ulttyq ýnıversıteti ekspedıtsııasynyń materıaldary, sondaı-aq álem túriktanýshylarynyń ǵasyrdan astam ýaqyt júrgizgen zertteýleriniń qorytyndysy paıdalanylǵan.
«Atlas avtory baıyrǵy túrik mátinderin qaıta kóshirip, qaıta oqyǵan, burynǵy zertteýshilerdiń qateleri túzetilgen, túpnusqa mátininiń jańa transkrıptsııasy, jańa aýdarmasy jasalǵan, jańa túsiniktemesi berilgen; jartylaı kóshpeli dáýirdiń tarıhı-mádenı muralary atlasta tegis qarastyrylyp, olardyń arheologııalyq sıpattamasy, plany, foto, syzba sýretteri tuńǵysh ret tolyq berilgen», delingen habarlamada.
Atlas tilshi, tarıhshy, etnograf, arheolog, fılosof, ádebıetshy jáne mádenıettanýshy mamandarǵa, sondaı-aq stýdentterge, magıstranttarǵa, aspıranttarǵa, izdenýshilerge arnalǵan.
