Organıkalyq ónim shyǵarýshylarǵa ortaq óndiristik sertıfıkatpen jumys isteýge múmkindik berilmek
ASTANA. KAZINFORM – Májilis «Organıkalyq ónim óndirisi jáne aınalymy týraly» Zań men oǵan ilespe eki zańdy maquldady. Qujattardy ekinshi oqylymda Májilis depýtaty Aıdarbek Qojanazarov tanystyrly.
«Zań jobalaryn Parlament depýtattary organıkalyq ónimdi óndirý jáne onyń aınalymy salasyndaǵy zańnamany jetildirý, sondaı-aq ony halyqaralyq standarttarmen jáne organıkalyq óndiristi júrgizý praktıkasymen úılestirý maqsatynda ázirledi. Ózgerister organıkalyq óndiristi suranystar men ótkizý naryǵynyń qalaýyna baılanysty tańdalǵan standarttyń talaptaryna sáıkestigin sertıfıkattaýǵa múmkindik beredi. Sertıfıkattaý obektilerinen organıkalyq ónimder alynyp tastalady, tek óndiris protsesi ǵana sertıfıkattalady», - dedi ol.
Aıtýynsha, usynylyp otyrǵan zańnyń qoldanystaǵy zańnan birneshe aıyrmashylyǵy bar.
«Birinshi jaǵdaıda, shaǵyn fermerler birlesken kepildik júıesine birige alady. Bul rette olardyń ónimderi birlesken kepildik júıesi belgisin paıdalana otyryp tańbalanady. Organıkalyq ónim óndirýshiler birigý arqyly sertıfıkattaý shyǵyndaryn azaıta otyryp, protsedýradan birlesip óte alady. Bolashaqta bul óndirýshiler organıkalyq ónim óndirisiniń sáıkestik sertıfıkatyn bir-birinen táýelsiz paıdalana almaıdy», - dedi depýtat.
Sondaı-aq, zań jobasynda organıkalyq ónimdi satý mynandaı sharalar arqyly qadaǵalanatyny aıtylǵan:
- tutynýshylardyń quqyqtary men halyqtyń densaýlyǵyn qorǵaý;
- «organıkalyq» degen atpen satylatyn, organıkalyq emes ónimder aınalymynyń jolyn kesý;
- otandyq organıkalyq ónim óndirýshilerdi jalǵan tańbalaýǵa baılanysty azamattarymyzdy adastyratyn ımporttaýshylar tarapynan josyqsyz básekelestikten qorǵaý.
«Іlespe zań jobasynda óndirýshilerdi eki baǵyt boıynsha memlekettik qoldaý kózdeledi:
- sáıkestik sertıfıkaty qunynyń 50% sýbsıdııalaý;
- organıkalyq tyńaıtqyshtardy sýbsıdııalaý.
Sońǵy qoldaý sharasy 2028 jyldyń birinshi qańtarynan bastap qoldanysqa engiziledi.Qazirgi ýaqytta organıkalyq ónimder suranysqa ıe bolǵandyqtan, zańdardy qabyldaý salanyń damýyna oń áser etedi, jergilikti organıkalyq ónim naryǵyn damytýǵa negiz bolady jáne syrtqy naryqtardaǵy eksportqa baǵdarlanǵan kásiporyndardyń básekege qabilettiligin arttyrýǵa múmkindik beredi dep sanaımyz», - dedi Aıdarbek Qojanazarov.
