Organıkalyq eginshilikke jaramdy jerlerdiń tsıfrlyq kartacy jasalady — AShM
ASTANA. KAZINFORM — Aýyl sharýashylyǵy mınıstri Aıdarbek Saparovtyń tóraǵalyǵymen agrarlyq ǵylymdy damytý jáne Ulttyq agrarlyq ǵylymı-bilim berý ortalyǵynyń (UAǴBO) qyzmetine qatysty máseleler talqylanǵan keńes ótti. Bul týraly vedostvonyń baspasóz qyzmeti málim etti.
— Memleket basshysy bizge agrarlyq ǵylymdy damytý boıynsha birqatar mańyzdy mindet júktedi. Onyń ishinde UAǴBO-nyń qyzmeti de bar. Bul ortalyq ǵylym, bilim men bıznesti biriktiretin biryńǵaı ári tıimdi ekojúıege aınalýy tıis. Bul — elimizdiń agroónerkásiptik kesheniniń básekege qabilettiligin arttyrý, sheteldik tehnologııalarǵa táýeldilikti azaıtý jáne azyq-túlik qaýipsizdigin nyǵaıtý úshin asa mańyzdy. Biz agrarlyq ǵylymdy jańa sapaly deńgeıge shyǵarý úshin eń aldymen sheshilýi tıis máselelerdi anyqtap alýymyz qajet, — dedi mınıstr.
Vıtse-mınıstr Erbol Tasjúrekovtiń aıtýynsha, 2024 jyly memlekettik tapsyrys aıasynda UAǴBO 16 ǵylymı negizdelgen usynys ázirlegen. Al bıyl taǵy 10 usynys daıyndaý josparlanyp otyr. Qazirgi tańda baǵdarlama-maqsatty qarjylandyrý aıasynda selektsııa jáne tuqym sharýashylyǵy, organıkalyq eginshilik, maldy azyqtandyrý men ustaý tehnologııasy, sondaı-aq aýyl sharýashylyǵy ónimderin tereń óńdeý sııaqty negizgi baǵyttardy qamtıtyn 34 ǵylymı-tehnıkalyq baǵdarlama júzege asyrylyp jatyr.
2024–2026 jyldary aralyǵynda UAǴBO-nyń enshiles uıymdary 7 negizgi baǵyt boıynsha 26 baǵdarlamany iske asyrady. Nátıjesinde aýyl sharýashylyǵy daqyldarynyń 109 jańa sorty men býdandary shyǵarylady, 2,3 myń tonna bastapqy tuqym óndirilip, 11 selektsııalyq jetistik pen maldy ustaý jáne azyqtandyrý boıynsha 7 tehnologııa ázirlenedi dep kútiledi.
Sonymen qatar organıkalyq eginshilikke jaramdy jerlerdiń tsıfrlyq kartalaryn jasaý, aýyl sharýashylyǵy ónimderin tereń óńdeýdiń 42 joǵary tehnologııaly ádisin ázirleý, azyq-túlik qaýipsizdigi boıynsha 19 usynys daıyndaý jumystary júrgizilip jatyr. Jumysshy mamandyqtar jyly aıasynda mınıstrlik kadr daıarlaý, jumys oryndaryn ashý jáne agrarlyq mamandyqtardyń bedelin arttyrý boıynsha salalyq jospar bekitti.
— Biz óńirlermen birlesip, suranysqa ıe mamandar — agronomdar, selektsıonerler, veterınarlar, mehanızatorlardy daıarlaý isin kúsheıtýimiz qajet. Aýyl sharýashylyǵy joǵary oqý oryndarynyń qyzmetine tereń taldaý jasap, mamandardy daıarlaý protsesiniń eńbek naryǵy men qazirgi aýyl sharýashylyǵynyń talaptaryna tolyq sáıkes kelýin qamtamasyz etý mańyzdy. Jalpy, agrarlyq ǵylymnyń tıimdiligi salanyń tehnologııalyq ilgerileý qarqynyn aıqyndaıdy. Sondyqtan ǵylymı ázirlemelerdiń sapasyn arttyrý men olardy óndiriske jedel engizýge kúsh salý qajet. Tek osy jolmen ǵana biz aýyl sharýashylyǵy óndirýshileri men el ekonomıkasy úshin naqty nátıje ala alamyz, — dedi Aıdarbek Saparov.
Buǵan deıin habarlanǵandaı, aýyl sharýashylyǵynyń jalpy ónim kólemi 4%-ǵa artty.