Óreskel qate jibergen sýdıalar jazadan qutylmaýy tıis – QR Joǵarǵy sot tóraǵasy

ASTANA. QazAqparat – Búgin Joǵarǵy sot 2022 jylǵy jumystyń qorytyndysyn shyǵardy, dep habarlaıdy QazAqparat atalmysh vedomstvonyń baspasóz qyzmeti taratqan aqpartqa silteme jasap.

Joǵarǵy sottyń keńeıtilgen keńesinde vedostvo basshysy Aslambek Merǵalıev sot júıesin damytýdyń jańa basymdyqtaryn aıqyndady.

Sot bıliginiń konservatıvti sıpatyna toqtala kele, ol sońǵy jyldary birqatar ómirsheń reformalar júrgizilgenin atap ótti. Spıker sot júıesin jańǵyrtý boıynsha sýdıalyq kadrlar, sot tóreligin júzege asyrý jáne sot ákimshiligin damytý boıynsha Prezıdent tapsyrmalarynyń oryndalý barysyna nazar aýdardy.

A.Merǵalıevtiń pikirinshe, reformalar jan-jaqty oılastyrylyp júrgizilgende ǵana azamattar men kásipkerlerdiń máselelerin sheshedi. Sot tóreliginiń sapasyn arttyrý maqsatynda kelesi sheshimder qabyldandy:

- sot protsesterin, ásirese, jabyq ister boıynsha, kámeletke tolmaǵandardyń quqyqtaryna qatysty, memlekettik organdar ókilderiniń qatysýymen bolatyn jáne t.b. otyrystardy oflaın formatta ótkizý;

- sot praktıkasyn qorytýmen baılanysty qujattardy ázirleýdi jandandyrý jáne Joǵarǵy Sottyń normatıvtik qaýlylaryn ózektendirý;

- óreskel qate jibergen sýdıalardyń jazadan qutylmaýyn qamtamsyz etý.

- sýdıalardyń eńbekaqy júıesin teńestirý.

Foto: facebook.com/AidosSaduakassov