ORES qory Qazaqstandaǵy jobalardy qarjylandyrady

ASTANA. KAZINFORM – Búgin Senattyń jalpy otyrysynda «Qazaqstan Úkimeti men OPEC Halyqaralyq damý qory arasyndaǵy jeke sektordaǵy operatsııalardy uıymdastyrý týraly negizdemelik kelisimdi ratıfıkatsııalaý týraly» Zań maquldandy.

- Bul kelisim memleketimizdiń ekonomıkasynyń ósýine jáne onyń turaqtylyǵyn arttyrýǵa yqpal etýge baǵyttalǵan. Kelisimniń negizgi maqsaty - qazaqstandyq jeke kompanııalardyń ORES qorynyń qarjy quraldaryna qol jetkizýin jeńildetý úshin turaqty platforma qurý. OPEC Halyqaralyq damý qorynyń negizgi mıssııasy – damýshy elderdiń áleýmettik-ekonomıkalyq damýyn qoldaý. Qor 50 jyl ishinde álemniń 125 elinde 4 myńnan astam jobany iske asyryp, jalpy somasy 30 mlrd AQSh dollarynan astam qarjy bóldi. Sońǵy 20 jylda Ortalyq Azııa elderine 1,4 mlrd AQSh dollarynan astam ınvestıtsııa tartylǵan. Atap aıtqanda, kelisim normalary uzaq merzimdi qarjylandyrýdy, ınvestıtsııalardy qorǵaýdy jáne yntymaqtastyqtyń ıkemdi sharttaryn qamtamasyz etýge negizdelgen, - dedi senator Sáken Arýbaev.

Zań normalarymen Qazaqstan aýmaǵynda ORES qory tolyq zańdy tulǵa retinde tanylyp, tikeleı salyqtardan bosatylyp, sondaı-aq oǵan halyqaralyq uıymdarǵa qatysty ımmýnıtetter men artyqshylyqtar berilip otyr. Qorǵa memlekettik kepildikter berý qajet emes bolǵanymen, jeke sektor jobalary Úkimetpen kelisiletini qarastyrylǵan.

Qor qyzmetiniń negizgi baǵyttary mynalardy qamtıdy:

– ınfraqurylymdy salý jáne damytý;
– klımattyń ózgerýine qarsy sharalar;
– azyq-túlik qaýipsizdigi;
– energetıkalyq aýysymǵa járdemdesý;
– tsıfrlandyrý jáne ınnovatsııalar;
– shaǵyn jáne orta bızneske ekonomıkalyq múmkindikter jasaý.

- Bul óz kezeginde naryqtyq jaǵdaılarmen salystyrǵanda, ásirese kapıtaldy kóp qajet etetin jáne uzaq merzimdi jobalar úshin óte qolaıly jaǵdaı sanalady. Budan basqa, ORES qorynan bólingen qarjynyń jumsalýy men ınvestıtsııalyq baǵdarlamalarynyń oryndalýy qatań baqylaýda bolatyny kelisilgen. Zańdy qabyldaý qarjy tartý kózderiniń keńeıýine, qarjy uıymdary arasyndaǵy básekelestiktiń artýyna, jeke sektorǵa ınvestıtsııalar men tehnologııalardyń kelýine, jańa kásiporyndar men jumys oryndarynyń qurylýyna, arab elderiniń halyqaralyq qarjy ınstıtýttarymen yntymaqtastyqtyń nyǵaıýyna, ınvestıtsııalyq ahýal men eldiń halyqaralyq bedeliniń artýyna múmkindik beredi. Zańnyń qabyldanýy áleýmettik-ekonomıkalyq nemese quqyqtyq máseleler týdyrmaıdy jáne bıýdjetten qosymsha shyǵyndardy talap etpeıdi, - dedi depýtat.

Jalpy, paıyzdyq mólsherlemeler jyldyq 2,5%-dan 5%-ǵa deıin, jeńildikti kezeń 6 aıdan 24 aıǵa deıin kózdeledi. Qaryz alý merzimi 22 jylǵa deıin bolýy múmkin.

Aıta keteıik, buǵan deıin OPEC+ elderi munaı naryǵynyń turaqtylyǵyn saqtaý jónindegi ustanymyn rastaǵanyn jazǵan edik.