Oreo pechenesiniń kremi «plastıkalyq jelim» ekeni ras pa

ASTANA. KAZINFORM — Áleýmettik jelilerde Oreo pechenesi qaýipti, onyń kremi «plastıkke uqsas jelim», al ózi «qan tamyrlaryn biteıdi» degen áńgimeler tarap jatyr.

Sanıtarııalyq-epıdemıologııalyq baqylaý komıteti baspasóz qyzmetiniń málimetinshe, bul aqparat shyndyqqa sáıkes kelmeıdi jáne ǵylymmen dáleldenbegen.

Oreo sııaqty barlyq pechene Eýrazııalyq ekonomıkalyq odaq elderinde satylý úshin mindetti túrde qaýipsizdik talaptarynan ótedi. Ol talaptarda ónimniń quramy, qaýipsizdigi, tańbalanýy, saqtaý merzimi men óndirýshi týraly tolyq aqparat bolýy kerek.

— 2025 jyly arnaıy tekseris kezinde Oreo pechenesiniń úlgileri zerthanada tekserilgen. Nátıjesinde onyń quramynan densaýlyqqa qaýipti eshteńe tabylmaǵan, mıkrobtar men zııandy zattar anyqtalmaǵan. Qaptamadaǵy aqparat ta barlyq talapqa saı bolǵan, — delingen habarlamada.

Sondyqtan komıtet azamattardy qyraǵylyq tanytýǵa, kúmándi derekkózderden alynǵan jalǵan aqparatqa senbeýge jáne tek resmı derekkózderde jarııalanǵan tekserilgen aqparatty basshylyqqa alýǵa shaqyrady.

Budan buryn Qazaqstan aımaqtarynda kondıterlik ónimderdiń baǵasy qansha turatynyn zerdelegen edik.