Óren Saǵyndyqov: Munaı taýsylǵanda qalaı kún kóremiz?

ASTANA. KAZINFORM — Shalqyǵan dalasy shejirege toly Mańǵystaý óńirinde qazaq saharasyna tán bar sıpat, bar qasıet jınaqtalǵandaı. Qupııasyn boıyna búkken ólkede tarıh tuńǵıyǵynan tamyr tartqan ózgeshe muralar da, týrızmge suranyp turǵan tabıǵat ta, tórt túlikti túgel órgizip, agroónim óndirýge de múmkindik mol. Bir salaǵa baılanýdyń zamany ozǵan. Ásirese, munyń tyńnan túren salǵan, qumnan munaı sorǵan aımaqta mańyzy zor. Erte me, kesh pe, «qara altynnyń» qory sarqylady. ıAǵnı, ekonomıkany ártaraptandyrý – zaman talaby. Elimizde buǵan alǵyshart ta, múmkindik te, resýrs ta jetedi. Bul týraly munaı-gaz salasyna eńbek sińirgen qyzmetker, ardager munaıshy Óren Saǵyndyqov málimdedi.

Sanaly ǵumyryn munaı salasyna sarp etken ardager-munaıshy Óren Saǵyndyqov dinı, rýhanı, tarıhı jádigerler men sáýlet eskertkishterin týrıstik ınfraqurylymnyń mańyzdy nysanyna aınaldyrýǵa bolady dep esepteıdi. Al óńirde ondaı jerler jetip-artylady. Ústirt, Bozjyra, Qarynjaryq jáne t.b. Buǵan qosa, Mańǵystaý oblysynda jún, teri óńdeýdiń qalyptasqan keremet úlgisi bar. Bir kezderi Óren Saǵyndyquly óńdeý ónerkásibiniń tamyryn basyp kóripti.

«Qalamqas munaı-gaz ken ornynda jumys istep júrgen kezimde Mańǵyshlaq stantsııasynan eki-úsh adam birigip teri ıleıtin shaǵyn tseh ashtyq. Eshkimge jar salmaı-aq ózimiz júrgizdik. Bylǵarydan jasalǵan kýrtka shyǵardyq, ózim sony 5-6 jyl kıdim. Qosymsha jumys kózderin ashqan jaqsy ǵoı. Qazir bireý maǵan endi qaıtadan nege ashpaısyń deýi múmkin. Biraq onyń mashaqaty, qıyndyǵy kóp, Úkimetten qoldaý kerek. Mine, aýyl sharýashylyǵy ónimin óndiretin oryndar bolsa. Erteń munaı taýsylǵanda ómir súrý kerek qoı», - deıdi ardager-munaıshy.

Munaı-gaz salasynyń ardaqty ardageri qara altynnyń qory taýsylatynyn bilgenin, biraq ózine, balalaryna, tipti nemerelerine jetip qalar dep oılaǵanyn aıtady. Osy oraıda, ol óńirdiń damý bolashaǵyn zamanaýı trend – jan-jaqtylyqpen baılanystyrady. Agroónerkásiptik keshenmen qatar, týrızmge jyly shyraı kerek degen pikirde.

«Ekonomıkany ártaraptandyrý degende óńirdegi týrızm jaıly aıtylyp júr ǵoı. Shynymen de mańǵaz Mańǵystaý týrızmge suranyp-aq tur. 360 áýlıeniń máńgilik mekeninde kóretin, baratyn jerler az emes. Bir ǵana Bozjyra shatqalynyń ataǵy alysqa ketken. Alaıda týrızm qyzyl sózben, jalań uranmen damymaıdy. Oǵan jaqsy jol, sapaly ınfraqurylym kerek. Memlekettik deńgeıde qoldaý qajet. Týrısterge arnap servıstiń de sapasyn arttyrmasa bolmaıdy», - deıdi kórip-bilgeni men terip-túıgeni kóp ardager.