«Orel ı reshka» baǵdarlamasy karantın rejımindegi Almatyny kórsetti

NUR-SULTAN. QazAqparat - «Orel ı reshka» telebaǵdarlamasynyń qazaqstandyq tilshileri arnaıy reportaj túsirdi, dep habarlaıdy QazAqparat tilshisi.

«Almaty 60 jyl boıy Qazaqstannyń astanasy bolǵan. 1998 jyly elorda Astanaǵa aýysty», - deıdi baǵdarlama júrgizýshisi Ivan Kvaşýk.

«Metro men qoǵamdyq kólik keshki saǵat 19:00-ge deıin ǵana jumys isteıdi. Kórip otyrǵandaryńyzdaı, aınalamyzda eshkim joq. Bári úılerinde otyr. Karantın tártibin buzǵandarǵa aıyppul salynady nemese 15 táýlikke qamaýǵa alynady», - deıdi baǵdarlama júrgizýshisi Anjelıka Fomınskaıa.

Ol Almatyǵa kelgen týrıst «Medeý» muz aıdynyna barsa, mindetti túrde Shymbulaqqa kóterilýi kerek ekenin aıtty.

«Karantın bolǵandyqtan, búgin bıiktigi 3 200 metr bolatyn Shymbulaqqa jaıaý kóterilemiz. Jańa jyl merekesindegi demalys kezinde bul jerge kúnine 9-11 myń adam kelgen. Al qazir bul jer bos tur», - deıdi ol.

Atalǵan baǵdarlama bıyl 18 sáýirde túsirilgen.