«Ordabasynyń» «Krasnodarmen» joldastyq matchy teń aıaqtaldy
ShYMKENT. QazAqparat - Ońtústik Qazaqstannyń «Ordabasy» klýby reseılik «Krasnodarmen» joldastyq kezdesý ótkizdi. Antalıa qalasyndaǵy «Kalısto» stadıonynda ótken eki komandanyń oıyny teń aıaqtaldy, dep habarlaıdy QazAqparat tilshisi.
«Ordabasy» klýbynyń baspasóz qyzmetinen habarlaǵandaı, komandanyń qarsylasy «Krasnodar» quramynda negizinen jastar óner kórsetken. Oıynnyń birinshi kezeńi qonaqtardyń basymdyǵymen ótip, nátıjesinde reseılikter qatarynan úsh gol salǵan.
Al oıynnyń ekinshi kezeńi múldem basqa baǵytta órbigen. Shymkenttik komandanyń oıynshysy Erkebulan Tuńǵyshbaev ádettegideı qaqpashymen betpe-bet shyǵyp baryp, esep aıyrmasyn qysqartty. Esep - 1:3 boldy. Sondaı-aq kezekti shabýyl kezinde Dıakateniń tepken dobyn qaqpashylardyń biri keri qaıtaramyn dep, abaısyzda óz qaqpasyna engizip aldy. Esep - 2:3. Oıynnyń aıaqtalýyna sanaýly mınýttar qalǵanda bıylǵy maýsymǵa erekshe daıyndyqpen kelgen Ular Jaqsybaev Abdrahmannyń jeke shyǵýyna múmkindik jasady. Alaıda, Reseıdiń «Krasnodar» oıynshylary ony óreskeldikpen shalyp qulatty. Sol jerden belgilengen 11 metrlik aıyp soqqysyn Abdýlaı Dıakate múlt jibermedi. Qorytyndy esep - 3:3.
Endi ońtústiktiń oıynshylary 27 qańtar kúni Grýzııanyń «Samtredıo» komandasyn qabyldaıdy dep josparlanýda.
