«Ordabasynyń» horvatııalyq legıonerin Shymkenttiń ystyǵy ábigerge salýda
ShYMKENT. QazAqparat - Shymkenttiń aptap ystyǵy «Ordabasy» komandasynyń sheteldik oıynshysy Olıver Petrakty biraz ábigerge salýda. Horvatııadan kelgen ortalyq qorǵaýshy shildeniń shilińgir ystyǵy naǵyz synaq bolyp otyrǵanyn aıtady, dep habarlaıdy QazAqparat HAA tilshisi.
Birinshi aınalymnan keıingi transferlik maýsymda «Ordabasynyń» sapyna shaqyrtý alǵan horvatııalyq Olıver Petrak «Shahter» komandasymen bolǵan matchta óziniń alǵashqy oıynyn ótkizdi. Ortalyq qorǵanysta komandanyń úılestirýshisi bolǵan onyń sheberligine jankúıerler jyly pikirlerin bildirýde. Al Olıver Petrak oıyn kezinde ońtústiktiń ystyq aýa raıy basty synaq bolǵanyn aıtýda.
«Eýropanyń qońyr salqyn klımatynan Shymkenttiń shilińgir ystyǵyna kóndigý maǵan aýyr synaq boldy. Degenmen, bizdiń komanda oıynnyń birinshi kezeńinde basymdyǵyn baıqatty. Solaı bola tura, kóptegen múmkindikterdi paıdalana almadyq. Qanshama ótkir shabýyldardy golǵa aınaldyrmadyq. Ekinshi taımda kóp kútken golǵa qol jetkizdik. Srdjan Výıaklııaǵa rızamyn. Alańǵa almasyp shyǵa salysymen, sáti kelgende keremet gol saldy. Negizinen, bizdiń jigitterdiń aýa raıynyń ystyǵyna qaramaı janyn salyp oınaǵany unady. Aldaǵy kezde de óz jankúıerlerimizdi qýantamyz dep senemin»,- dedi Olıver Petrak.
Aıta keteıik, Olıver Petrak 1991 jyldyń 6 aqpanynda Horvatııanyń Zagreb qalasynda týǵan. Fýtboldaǵy mansabyn «Zagreb» komandasynyń jasóspirimder komandasynda bastady. Budan keıin Horvatııanyń «Dınamo», «Lokomotıv», «Lýchko», «Istra-1961», «Sesvete» komandalarynda óner kórsetti. Al 2014 jyldan Bosnııanyń «Zrınskı» komandasynda oınady. Horvatııa jastar jáne jasóspirimder quramasynyń múshesi boldy. Negizinen ortalyq qorǵaýshy, úılestirýshi. Salmaǵy - 87 keli, boıy - 183 sm.
