Ordabasylyqtar Arys pen Túrkistannyń damýyna úles qosady

TÚRKІSTAN. QazAqparat – Túrkistan oblysyna qarasty Ordabasy aýdany tótenshe jaǵdaıdan zardap shekken Arys qalasyn qalpyna keltirý jumystaryna belsendi atsalysýda. Aýdan ákimi Álipbek Óserbaev Arys qalasyna jumys saparymen baryp, 13-sektor shtabynda atqarylǵan qurylys barysymen tanysty, dep habarlaıdy QazAqparat tilshisi.

Álipbek Óserbaev turǵyndarmen kezdesip, Ordabasy aýdanynan Arys qalasyna kómek munymen tolastamaıtynyn jetkizdi. Sonymen qatar, shtabtaǵy jaýapty mamandarǵa birqatar tapsyrmalar júktedi. Búginde shtabtyń jumysyn qamtamasyz etý úshin Ordabasy aýdany ákimdiginen 40 qyzmetker, sektordaǵy tazalyq jumystaryn júrgizý úshin 5 arnaıy tehnıka jumyldyrylǵan.

Jalpy, 13-sektorda 17 kóshe, 371 jeke turǵyn úı ornalasqan. Tótenshe jaǵdaı saldarynan 198 úıge zaqym kelip, barlyǵyna Ordabasy aýdany ákimdiginiń qyzmetkerleri aqaý aktilerin jasady. Qazirgi tańda 198 jeke turǵyn úıde aǵymdaǵy jóndeý jumystary aıaqtaldy.

Sondaı-aq, Ordabasy aýdanynyń ákimi men Túrkistan qalasynyń ákimi Túrkistan qalasyn abattandyrý, kógaldandyrý maqsatynda bekitilgen 13-sektor turǵyndarymen kezdesti. Ordabasy aýdanyna bekitilgen 13-sektor aýmaǵynda 50 kóshe bar. Ortasha jóndeýdi qajet etetin jol uzyndyǵy - 73,7 shaqyrym. Aýmaqqa 13 730 aǵash otyrǵyzý kózdelgen. 97 shaqyrymǵa jaryqsham tartý, aıaqjol salý josparlanǵan.

Túrkistan qalasynyń ákimi Rashıd Aıýpov 4 jylda ınfraqurylym júıesiniń barlyq máselesi sheshiletinin, qazirgi tańda qujattar rásimdelip jatqanyn aıtyp ótti.

Álipbek Óserbaev turǵyndardy birlikke shaqyryp, atqarylǵan tirlikke uıytqy bolýǵa úndedi.