Ordabasylyq polıtseıler adasyp qalǵan 3 jasar búldirshindi taýyp, úıine qaıtardy
ORDABASY. QazAqparat - Túrkistan oblysyyń Ordabasy aýdanynda polıtseıler adasyp qalǵan 3 jasar búldirshindi taýyp aldy. Kishkentaı qyz aýdan ortalyǵy Temirlan aýylyndaǵy saıabaqtardyń birinen tabyldy, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, búldirshin keshki saǵat 21:30-da qydyryp júrgen. Ordabasy aýdandyq PB JPQ ýchaskelik ınspektorlary adasyp qalǵan kishkentaı qyzdy baıqap qalǵan. Tártip saqshylary Tımýr Manabaev pen Elaman Spabekov ony polıtsııa bólimine jetkizgen. Artynsha ata-anasyn izdeýge kirisken. Olar qyzdan qaıda turatynyn suraýǵa tyrysqanymen naqty jaýap ala almaǵan. Sodan soń polıtsııa jaıaý júrginshiler men dúken ıeleriniń jáne jol boıyndaǵy tamaqtandyrý oryndaryn tekserip shyǵyp, jaqyn mańdaǵy polıtsııa pýnkterine habar bergen.
«Jarty saǵattan keıin polıtsııa qyzmetkerlerine joǵalǵan qyzdyń atasy kelgen. Olar jergilikti turǵyn bolyp shyqty. Atasy nemerelerimen birge «Arbat» saıabaǵynda serýendep júrip, baladan kóz jazyp qalǵanyn aıtqan. Ýchaskelik ınspektorlar tabylǵan 3 jasar qyzdy aman-esen atasyna qaıtardy. Qarııa joǵalǵan nemeresin jedel taýyp alǵan tártip saqshylaryna úlken alǵysyn bildirdi» delingen habarlamada.
