Ordabasyda polıetılendi qaıta óńdeıtin zaýyt salynyp jatyr
TÚRKІSTAN. QazAqparat - 2019 jyldyń І jartyjyldyǵynda jalpy quny 6,6 mlrd teńge «AVF Invest» JShS Badam óndiristik aımaǵynan polıetılen buıymdaryn qaıta óńdeıtin zaýyttyń І-kezeńi iske qosyldy, dep habarlaıdy QazAqparat oblysy ákiminiń baspasóz qyzmetine silteme jasap.
Kásiporynda 2025 jylǵa deıin óńirdegi qatty turmystyq qaldyqtardyń 35%-y óńdelip, qaıta kádege jaratylatyn bolady.
Budan ózge, aýdanda ónerkásip ónim kólemin bıyl 19,4 mlrd teńgege jetkizip, ótken jylmen salystyrǵanda naqty kólem ındeksin 105,5 paıyzǵa arttyrý josparlanyp otyr. Al óńdeý ónerkásibinde 17,9 mlrd teńgeniń ónimi óndiriledi dep boljanýda.
Indýstrıaldy-ınnovatsııalyq damý memlekettik baǵdarlamasymen «Óńirler kásipkerligin qoldaý kartasy» aıasynda 2019 jyly jalpy quny 4,6 mlrd teńgeniń ınvestıtsııalyq jobasyn II-kezeń boıynsha iske qosý josparlanýda. Ol «Green Technology industries» JShS ozyq tehnologııa arqyly polıetılen ónimin qaıta óńdep, sıntepon talshyǵyn óndirýdi qolǵa alady.
Bıyl aýylsharýashylyq salasy boıynsha aýdan kóleminde jalpy ónim kólemin 40,1 mlrd teńgege, ıgeriletin egistik jerlerdiń kólemin 65 100 gektarǵa jetkizip, aınalymǵa 2 500 ga jerdi qosý, jylyjaı kólemin qosymsha 20 gektarǵa ulǵaıtý mejelenip otyr.
