«Ordabasy» óz alańynda taǵy da jeńiske jetti
ShYMKENT. QazAqparat - Shymkenttiń «Ordabasy» fýtbol komandasy óz alańynda taǵy da jeńiske jetti. Qazaqstan premer- lıgasynyń tórtinshi týrynda kúngeılik aıaqdopshylar Kókshetaýdyń «Oqjetpes» komandasyn 2:1 esebimen utty.
Birinshi taımda qonaqtardyń joly bolyp, 45-shi mınýtta Maksım Fedın esepti ashty. Úzilisten soń alań ıeleri jankúıerlerdiń aldynda namysqa tyrysty. Nátıjesinde «Oqjetpes» komandasy qaqpasyna dop salýdyń birneshe múmkindikteri boldy. Araǵa 2 mınýt salyp, Tańat Nóserbaev esepti teńestirdi. Bul gol Alekseı Petrýshın shákirtteriniń jeńiske degen senimin arttyrdy. Oıynnyń 69-shy mınýtynda Nıkıta Bocharovtyń joıqyn soqqysyn «Oqjetpes» qaqpashysy qaıtarýda qatelikke boı aldyrdy.
«Birinshi taımda oıynshylarymyzdyń joly bolmady. Úzilisten soń jankúıerlerimizdiń aldynda namysqa tyrysyp, jeńiske jettik. Fýtbolshylarymyz tamasha oıyn kórsetti. Aldaǵy matchtarymyzda da osyndaı oıyn kórsetemiz dep senim artamyn»,- dedi «Ordabasy» fýtbol komandasynyń bas bapkeri Alekseı Petrýshın.
Qalǵan mınýttarda qos komanda birneshe shabýyl jasaǵanymen, nátıjeli bolmady. Osylaısha «Ordabasy» fýtbol komandasy jeńiske jetip, upaılar sanyn 10-ǵa jetkizdi.
«Ordabasy» fýtbolshylary múmkindikti paıdalanyp, úsh upaı ıesine aınaldy. Birinshi taımda shákirtterim oıdaǵydaı oıyn kórsetti. Biraq ekinshi taımda qarymta shabýyldardy jiberip aldyq»,- dedi «Oqjetpes» fýtbol komandasynyń bas bapkeri Vladımır Mýhanov.
Qazir kúngeılik komandy týrnılik tizimde birinshi bolyp tur. Endi jeńimpaz komanda 4 sáýirde Qostanaıda «Tobylmen» oınaıtyn bolady.
