«Ordabasy» óz alańynda «Astanany» oısyrata jeńdi
ShYMKENT. QazAqparat - Shymkenttiń «Ordabasy» komandasy úshin el chempıonaty sátti bastaldy. Búgin «Astana» komandasymen bolǵan jaýapty kezdesýde kúngeılik aıaqdopshylar 3:0 esebimen jeńiske jetti, dep habarlaıdy QazAqparat HAA tilshisi.
Shym shaharda ótken oıynǵa 7 myńǵa tarta kórermen jınaldy. Oblys ákimi Janseıit Túımebaev pen Qazaqstan Fýtbol federatsııasynyń prezıdenti Seıilda Baıshaqov ta arnaıy qatysyp otyrdy. Oıyndy alań ıeleri asa saqtyqpen bastady. Kezdesýdiń 15-shi mınýtynda «Astana» komandasynyń qorǵaýshylary aıyp alańyna jaqyn jerde qolmen oınap, oıyn erejesin óreskel buzdy. Osy jerden belgilengen aıyp dobyn keremet oryndaǵan Mardan Tólebek qaqpaǵa alǵashqy goldy saldy. Joıqyn soqqyǵa qaqpashy N.Erıch eshbir amal taba almady.
Oıynnyń ekinshi kezeńi Elordalyq aıaqdopshylardyń jappaı shabýylymen bastaldy. Alaıda «Astananyń» sapynda óner kórsetken Talǵat Nóserbaev pen Azat Nurǵalıev syndy jigitter olarǵa qarsy amal oılap tapty. Osyndaı alma-kezek shabýyl kezinde qaqpashymen betpe-bet shyqqan Azat Nurǵalıev óz sheberliginiń arqasynda esepti 2-0-ge jetkizdi. Osy esepti saqtap qalý úshin kúsh salǵan reseılik maman A.Petrýshınniń shákirtteri taǵy bir gol salýǵa qol jetkizdi. Matchtyń aıaqtalýyna úsh mınýttaı ýaqyt qalǵanda «Astana» komandasynyń aıyp alańyna jaqyn tusta taǵy da oıyn erejesi buzyldy. Aıyp soqqysyn jasaǵan Azat Nurǵalıevtyń dobyna birinshi jetken Abdýlaı Dıakate úshinshi goldyń avtory atandy.
Kezdesý sońynan bolǵan baspasóz máslıhatynda «Ordabasynyń» bas bapkeri Alekseı Petrýshın shetelden kelgen oıynshylardyń belsendiligi basym ekenin atap ótti. Ásirese 33 saǵat boıy samoletpen Argentınadan ushyp kelgen Fontanello men Túrkııadaǵy oqý-jattyǵý jıynyna qatyspaı-aq óz myqtylyǵyn dáleldegen Abdýlaı Dıakateniń ónerine tánti bolǵanyn aıtty.
Alty jyl boıy azýly qarsylas «Astanaǵa» qarsy amalyn taba almaı júrgen «Ordabasylyqtar» osylaısha chempıonatty sátti bastady. Komandanyń endigi qarsylasy «Atyraý» komandasy bolmaqshy. Eki komandanyń kezdesýi 12 naýryz kúni Shymkenttegi «Qajymuqan» ortalyq stadıonynda ótedi dep kútilýde.
