«Ordabasy» komandasy bosnııalyq fýtbolshylarmen baq synasady
ShYMKENT. QazAqparat - Shymkenttiń «Ordabasy» komandasy Bosnııanyń «Shırokı Brıek» komandasynyń fýtbolshylarymen kúsh synasatyn boldy. Bul týraly Shveıtsarııada ótken fýtboldan Eýropa lıgasynda óner kórsetetin komandalar arasynda jerebe tartylý barysynda málim boldy. Kúngeılik komandanyń alǵashqy oıyny Shymkentte ótedi, dep habarlaıdy QazAqparat HAA tilshisi.
Sonymen fýtboldan Eýropa lıgasynda Qazaqstannyń úsh komandasy óner kórsetedi. Almatynyń «Qaırat» komandasynyń fýtbolshylary Lıtvanyń «Atlantasymen» synǵa tússe, Pavlodardyń «Ertisi» Bolgarııanyń «Dýnaı» komanasynyń fýtbolshylarymen jarysady. Al, Ońtústik Qazaqstan oblysynyń namysyn Eýropa lıgasynda qorǵaıtyn «Ordabasy» komandasy Bosnııanyń «Shırokı Brıek» komandasymen jasyl alańǵa shyqpaq.
Ordabasylyqtardyń qarsylasy óte myqty bolyp tur. Bosnııalyq komanda óz elderiniń eki dúrkin chempıony, úsh dúrkin kýbok jeńimpazy atanǵan. Áıtse de, «Ordabasy» komandasynyń kósile shabýyna óz alańy kedergi bolýy múmkin. Óıtkeni, Qajymuqan atyndaǵy ortalyq stadıon jaryqtyń bolmaýyna baılanysty keshki ýaqytta jumys istemeıtin. Keıbir shendilerdiń kesirinen bólingen qarjy da ıgerilmeı otyr. Osynyń saldarynan jankúıerler oıyndardy eshbir talaptarǵa saı emes, tipti arnaıy kólikterge arnalǵan turaǵy da, jaryǵy da joq «BIІK» stadıonynda kórýge májbúr bolýda.
Bul másele tez arada sheshimin tappasa, Eýropanyń lıga oıyndary Taraz nemese Almaty qalasynda ótýi múmkin. Jankúıeri, qoldaýshysy joq komandanyń jeńiske jetýi de qıyn bolar, sirá. Qalaı bolǵanda da «Ordabasy» alǵashqy kezdesýin 29 maýsym kúni óz alańynda ótkizedi dep kútilýde.
