«Ordabasy» komandasy bıyl úzdik úshtikke enýdi kózdeıdi
ShYMKENT. QazAqparat - Ońtústik Qazaqstan oblysynyń «Ordabasy» komandasy bıylǵy úzdik úshtikke enýdi kózdeıdi. Bul týraly búgin komanda jattyqtyrýshylary men oıynshylarynyń oblys ákimimen kezdesýi barysynda sóz boldy. Basqosýda aımaq basshysy Janseıit Túımebaev komandanyń jańa maýsymdaǵy daıyndyǵymen tanysty. Klýb quramyna alynǵan aıaqdop sheberleriniń múmkindigi saralanyp, komandanyń aldaǵy maqsat-mindetteri aıqyndaldy, dep habarlaıdy QazAqparat HAA tilshisi.
Oblys basshysy «Ordabasy» fýtbol klýbynyń prezıdenti Baqtııar Baıseıtovpen aldaǵy maqsat-mindetter jóninde pikir almasty. Komanda jańa maýsymdaǵy alǵashqy aınalymda, myqty alty komandanyń qataryna enýdi josparlap otyr. Sóıtip, el birinshiligindegi júldeli orynǵa turaqtaý. Budan bólek, Eýropa lıgasy oıyndarynda toptyq kezeńge shyǵý mindeti qoıyldy. Óz kezeginde oblys ákimi «Ordabasy» komandasyna eýrokýboktyq oıyndarda joǵarǵy deńgeıde óner kórsetýine tilektestik bildirdi.
«Álemde fýtboldyń jankúıerleri mıllıondap sanalady. Ómir kórsetkendeı eshqandaı klýb eger jaqsy oıynshylary bolmasa jaqsy nátıjege jete almaıdy. Alańdaǵan árbir oıynshy kóptegen qasıetterge ıe bolýy kerek. Eń bastysy - ár fýtbolshy jergilikti jankúıerlerdiń úmitin aqtap, óńirimizdiń atyn Eýropaǵa tipti álemge tanytýǵa tyrysý qajet. Sonda ǵana úmit aqtalady, sportshylar maqtalady», - dedi J.Túımebaev.
Jıyn barysynda fýtbolshylar atynan komanda kapıtany Azat Nurǵalıev sóz alyp, «Ordabasy» komandasy jańa maýsymǵa arnalǵan jattyǵýlaryn oıdaǵydaı ótkizgenin jetkizdi.
«Bıyl klýb quramyna myqty fýtbolshylar alyndy. Olaı bolsa oblys basshylyǵy men jankúıerler qoıǵan talapty oryndaý úshin bar kúsh-jigerimizdi ortaǵa salamyz», -dedi komanda kapıtany.
Budan bólek, kezdesý barysynda jergilikti fýtboldy damytý tóńiregindegi birqatar máseleler aıtyldy. Janseıit Qanseıituly aldaǵy ýaqytta «Qajymuqan» atyndaǵy ortalyq stadıon zamanaýı jaryqtandyrý júıesimen jabdyqtalatynyn atap ótti. Bul ÝEFA-nyń talaby.
Aıta keteıik,«Ordabasy» fýtbol klýby chempıonattyń tusaýkeser oıynyn 8-naýryz kúni «Qajymuqan» atyndaǵy ortalyq stadıonda «Astana» fýtbolshylaryna qarsy oıynmen bastaıdy. Sársenbi kúngi bul kezdesý saǵat 15:00-ge belgilenip otyr.
