«Ordabasy» fýtbolshylaryna tórt aılyq jalaqy qaryzy tólendi
ShYMKENT. QazAqparat - Shymkenttiń «Ordabasy» fýtbol klýbynyń oıynshylaryna jalaqy qaryzy tolyǵymen tólendi. Bul týraly komandanyń oıynshysy Kırıll Kovalchýk málimdedi, dep habarlaıdy QazAqparat.
Kırıll Kovalchýk klýbtyń resmı saıtyna bergen suhbatynda oıynshylardyń qazirgi jaǵdaıy týraly aıtyp ótken.
«Qazir jattyǵýlardy bastap kettik, barlyǵy da óz jumysyn jaýapkershilikpen, 100 paıyzǵa atqarýda. Kórinip tur, barlyǵynyń kóńil-kúıi, jattyǵýǵa degen ynta-yqylasy jaqsy. Alǵashqy kúnnen bastap oıynshylardyń aldyna tıisti talaptar qoıylyp jatyr. Jańa bapkermen tanysyp, onyń talaptaryn tyńdadyq. Basshylyq tarapynan alǵashqy qadam jasaldy. Ýádelerinde turyp, barlyq jalaqy qaryzdaryn tóledi. Jańa jylda qaryzsyz bastaǵannyń ózi jaqsy emes pe?!. Biz sońyna deıin sendik, basshylyqpen kelissózder júrdi. Sondyqtan jańa maýsymda barymyzdy salyp jumys isteýge daıynbyz»,- deıdi Kırıll Kovalchýk.
Aıta keteıik, «Ordabasy» fýtbol klýbynda tórt aı kólemindegi jalaqy qaryzy qordalanyp qalǵan bolatyn. Tipti komandanyń bas bapkeri Alekseı Petrýshın qyzmetinen ketti. Al bıyldan bastap komandaǵa jańa bapker kelip, oıynshylar Túrkııada jańa maýsymǵa kezekti daıyndyqtaryn bastap ketti. Oıynshylar almasyp, komandaǵa «Ertistiń» qorǵaýshysy Damır Dáýitov pen ýkraınalyq qorǵaýshy Igor Sıkorskıı keldi. Osy aptada sondaı-aq senegaldyq fýtbolshy Abdýlaı Dıakate komanda sapyna qosylady dep kútilýde.
