«Ordabasy» fýtbol komandasynyń oıynshylary kıeli Otyrar jerinde boldy
ShYMKENT. QazAqparat - Ońtústik Qazaqstan oblysynyń «Ordabasy» fýtbol komandasynyń oıynshylary kıeli Otyrar jerinde boldy. Otyrar aýdanynyń ákimi Erlan Aıtahanovtyń arnaıy shaqyrtýymen kelgen aıaqdopshylar Arystan bab kesenesin aralap kórdi, dep habarlaıdy QazAqparat tilshisi.
Elbasymyz N. Nazarbaevtyń elimizde buqaralyq sportty damytý jóninde baǵdarlamalyq tapsyrmalar bergeni belgili. Osy rette fýtboldan el birinshiliginde oblystyń namysyn qorǵap júrgen «Ordabasy» klýbynyń múshelerin qonaqqa shaqyrǵan aýdan ákimi Erlan Aıtahanov sportshylardy qaqpadan kútip alyp, búginde Otyrardyń brendine aınalǵan shubat usyndy.
Bas qaqpada az-kem aıaldaǵan qonaqtar birden Arystan bab áýlıeniń kesenesine bet túzedi. Mysyr jerindegi ǵulama babamyz - Ábý Nasyr ál-Farabı men dańqty qolbasshy Sultan Beıbarystyń zırattarynan ákelinip, topyraqtary osynda qoıylǵan keshenmen tanysty.
Qasıetti juma kúnimen tuspa-tus kelgen saparda qonaqtar Arystanbab kesenesinde Quran oqyp, nıet bildirip, qurban shaldy. Munan soń qurmetti qonaqtar arnaıy jaıylǵan dastarhan basynda bas qosyp, kóterińki kóńil-kúı syılaǵan kontserttik baǵdarlamany tamashalady. Basqosýda «Ordabasy» klýbynyń prezıdenti Baqtııar Baıseıitov aýdan basshysyna osy kezdesýdi uıymdastyrǵany úshin klýb músheleriniń atynan rızashylyǵyn jetkizip, Erlan Qýanyshulyna «Ordabasy» fýtbol klýbynyń qos jeıdesi men otyrarlyqtarǵa arnalǵan kádesyıyn tabystady.
Aýdan ákimi óz kezeginde negizgi qurammen kelgen komandaǵa alǵysyn aıta otyryp, otyrarlyqtardyń atynan Baqtııar Danııaruly bastaǵan Alekseı Petrýshın, Aıtqul Aqynbaev, Samat Smaqov, Tımýr Iksanov, Pavel Pıshýlınderdiń ıyqtaryna shapan jaýyp, syı-qurmet kórsetti.
Munan keıin sportshylar «Rýhanııat-Ábý Nasyr ál-Farabı» mýzeıin aralap, taǵylymy mol tarıhı qundylyqtarmen tanysty. Jýrnalıster men fýtbol jankúıerlerine arnap baspasóz konferentsııasyn ótkizdi. Klýb prezıdenti qoıylǵan suraqtarǵa tolyqqandy jaýap berdi. Memlekettik Ánuran avtorlarynyń biri, kompozıtor Shámshi Qaldaıaqovtyń týǵan jerindegi «Alpamys batyr» atyndaǵy sport kesheninde «Ordabasynyń» negizgi quramy men Otyrar aýdanynyń quramasy joldastyq kezdesý ótkizdi.
Buqaralyq sportty damytý, jastardyń aıaqdopqa degen qyzyǵýshylyǵyn arttyrý maqsatynda ótken oıynda jeńis tórine dostyq pen yntymaq shyqty.
