«Ordabasy» Bosnııada jeńilip qaldy
ShYMKENT. QazAqparat - Ońtústik Qazaqstan oblysynyń «Ordabasy» fýtbol komandasy Bosnııada jeńilip qaldy. «Shırokı Brıeg» komandasy óz alańynda 2-0 esebimen alǵa shyqty , dep habarlaıdy QazAqparat HAA tilshisi.
Kezdesý «Ordabasy» fýtbolshylarynyń shabýylymen bastaldy. Degenmen, alǵashqy qaýipti sátti qonaqtar jasady. Slavka Bralıchtiń tepken doby qaqpa baǵanasyna tıip keri ketti. Qonaqtar sapynda Fontanello bes metrdeı jerden soqqy jasap dopty qaqpadan bıiktetip jiberdi. Oıynnyń 37-shi mıınýtynda sol Fontanello aıyp alańynda Ivan Krıstanovıchti shalyp jyqty. Osy óreskeldigine oraı vengrııalyq tóreshi «Ordabasy» qaqpasyna 11metrlik aıyp dobyn belgiledi. Krıstanovıchtiń ózi aıyp soqqysyn tamasha oryndap óz komandasyn alǵa shyǵardy. Esep 1-0.
Osylaısha oılamaǵan jerden qatelik jibergen Alekseı Petrýshın shákirtteri esepti teńestiremiz dep júrip taǵy bir qatelikke boı aldyrdy. Bul rette qaqpashy Almat Bekbaev áýedegi dopty qaıtaramyn dep, der kezinde jete almaı qaldy. Osyndaı olqylyqty paıdalanǵan Krıstonovıch ekinshi goldy baspen saldy. Esep 2-0.
Ekinshi kezeńde «Ordabasy» basym oınady. Biraq, ótkir shabýylǵa núkte qoıatyn has sheber shabýylshy bolmady. Tańat Nóserbaevty eki birdeı myǵym qorǵaýshylar qorshap júrdi. Alań ıeleri ekinshi taımdy kóbinde alystan teýip esepti ulǵaıtpaq boldy. Degenmen, Almat Bekbaev qyraǵylyq tanytyp birneshe soqqyǵa tosqaýyl bola bildi. Bas bapker alańǵa Vıtalıı Lı men Nıkıta Bocharovty shyǵarǵanymen, olar da oıynǵa ózgeris engize almady. Tablodaǵy esep 2-0 kúıinde oıyn aıaqtaldy.
Endi qarymta kezdesý 6 shilde kúni Almaty qalasyndaǵy ortalyq stadıonda saǵat 21-00-de ótedi. Óz alańynda talapqa saı emes jaryqtyń saldarynan kezdesý ótkize almaıtyn «ordabasylyqtar» Almatyǵa sabylatyn bolady. Jyldar boıy kútken jankúıerlerdiń basym bóligi óz komandasynyń matchyn ózderi tamashalaı almaıdy. Qalaı bolǵanda da Eýropa lıgasyna jol tartqan Shymkenttiń «Ordabasynyń» áli de jarysty jalǵastyrýǵa mol múmkindigi bar.
