Ordabasy aýdanynyń qurylǵanyna - 55 jyl

Saltanatty sharalar tańǵy 8:00-de bastaý aldy. Aldymen aýdan ortalyǵy Temirlan aýylyndaǵy Qajymuqan atyndaǵy ortalyq stadıonda estafetalyq marafony ótti. Onda sport sheberi Abzal Arystanbek merekelik jalaýdy kóterip júrdi. Marafonshylar stadıonnan shyqqan boıda ortalyq alańǵa deıin júgirip keldi. Munda kópshilik aýdandyq mádenıet úıiniń ónerpazdary daıyndaǵan tarıhı sahnalyq kórinisti tamashalady. Aýdan ákiminiń orynbasary Ańsarbek Ábdiqulov ordabasylyqtar men qonaqtardy 55 jyldyq merekemen quttyqtady. Merekelik sharalar avtosherýmen jalǵasyn tapty. «Batys Eýropa-Batys Qytaı» halyqaralyq kólik dáliziniń boıyndaǵy Qaraýyl tóbe mańynda estafetany atty marafonshylar jalǵastyrdy. Qaraýyl tóbeniń bıigine kóterilgen olar 55 jas dombyrashynyń súıemeldeýimen jalaýdy saltanatty túrde kóterdi.

Saltanatty jıyn jastar saraıynda «Tarıhqa tunǵan Ordabasy» atty ǵylymı-tanymdyq konferentsııamen jalǵasty. Onda ǵalymdar Ordabasy aýdanynyń qurylý jolyndaǵy tyń derektermen bólisti. Sondaı-aq mereıtoıdyń mańyzdylyǵyna toqtalyp, aýdandy týrızmniń oshaǵyna aınaldyrý jaıy qozǵaldy.

«Búgingi tańda Ordabasy aýdanynda úlken is-shara uıymdastyrylyp, ótkizilip otyrǵan jaǵdaıy bar. «50 jylda el jańa» degendeı bizdiń osy Ordabasy aýdanyna 55 jyl tolyp otyr. Bizdiń aýdan ákimi jańadan taǵaıyndalǵan. Endi eldiń kórkeıýine bar kúsh-jigerin salady dep senemiz», - deıdi Ordabasy Ulttyq tarıhı – mádenı qoryq mýzeıiniń dırektory Bahadyr Esmatov.

Aıta keteıik, Ordabasy taýynyń qoınaýynda 1726 jyly Orda tigilip, qazaqtyń úsh júziniń ıgi jaqsylarynyń basy qosylyp, jońǵar basqynshylyǵyna qarsy kúreske halyqty jumyldyrý jaıy talqylandy. Bul jıyn-qazaq eli tarıhyndaǵy asa aýyr syn kezinde, halyqtyń rýhyn kóterip, ulttyq namystyń otyn jaqqan, júrekke jiger, boıǵa qýat berip, aldaǵy uly shaıqastarǵa bir­tutas el bolyp attanýdyń taǵdyryn shesh­ken asa mańyzdy oqıǵa bolyp sanalady. Osy kezden bastap-aq, ol kıeli, áýlıeli jer sanalyp keledi. «Kúltóbeniń basynda kúnde jıyn»-degen sóz sol zamannan qalǵan.