Ordabasy aýdanynyń ákimi Álipbek Óserbaev ómirden ozdy
ORDABASY. QazAqparat - Túrkistan oblysynyń jurtshylyǵy, zııaly qaýym aýyr qazaǵa dýshar boldy. Sanaly ǵumyryn oblystyń ekonomıkasy men áleýmettik damýyna arnaǵan abzal azamat, Ordabasy aýdanynyń ákimi Óserbaev Álipbek Sháripbekuly 58 jastan asqan shaǵynda mezgilsiz dúnıeden ozdy.
Álipbek Sháripbekuly 1961 jyly 20 tamyzda burynǵy Ońtústik Qazaqstan oblysy, Qyzylqum aýdany, Baltakól aýylynda sharýa otbasynda dúnıege kelgen. 1983 jyly Qazaq hımııa-tehnologııalyq ınstıtýtyn bitirgen. Mamandyǵy boıynsha – hımık-tehnolog.
Eńbek jolyn 1983 jyly Qaraǵandy asbest-tsement ónimderin shyǵaratyn zaýyttyń mashınısti bolyp bastaǵan. 1983-2005 jyldary qurylys salasynda eńbek etip, 2007 jyldan búgingi kúnge deıin Túrkistan qalasy ákimdiginiń qurylys bóliminiń meńgerýshisi, Kentaý qalasy ákiminiń orynbasary, Túrkistan qalasy ákiminiń orynbasary, Túrkistan qalasynyń ákimi, Ońtústik Qazaqstan oblysy kásipkerlik jáne ındýstrııaldy-ınnovatsııalyq damý basqarmasynyń basshysy, Ońtústik Qazaqstan oblysy ákiminiń birinshi orynbasary, Túrkistan qalasynyń ákimi, Ordabasy aýdanynyń ákimi qyzmetterin abyroımen atqardy.
Qoǵamǵa sińirgen eńbegi úshin Álipbek Óserbaev birneshe memlekettik nagradalarmen marapattaldy. Onyń ishinde «Astanaǵa 10 jyl», «Qazaqstan Respýblıkasynyń Táýelsizdigine 25 jyl» merekelik medaldary men «Qurmet» ordeni bar.
«Álipbek Sháripbekuly qandaı da bir jaýapty memlekettik qyzmette bolmasyn ózin isker uıymdastyrýshy, talapshyl basshy, biliktiliginiń arqasynda árbir istiń kózin taba biletin bastamashyl qasıetterimen oblystyń damýyna ózindik eńbegin sińirdi. Onyń ishinde Túrkistan qalasynyń áleýmettik-ekonomıka salasynyń ósip-órkendeýine aıtarlyqtaı úles qosty. Ómirin týǵan óńirge qyzmet etýge arnaǵan el azamatynyń beınesi halyqtyń esinde árqashan saqtala bermek»,-deıdi marqumnyń áriptesteri.
Álipbek Sháripbekulynyń ómirden ótýine baılanysty onyń otbasyna, aǵaıyn-týystary men urpaqtaryna, oblys jurtshylyǵyna qaıǵylaryna ortaqtasyp, kóńil aıtamyz. Ó.Shókeev, Q.Balabıev, Q.Aıtmuhametov, Á.Turǵymbekov, J.Amanbaev, U.Tájibaev, M.Myrzalıev, S.Qalqamanov, B.Tájibaev, J.Máýlenqulov,Ó.Meldehanov, R.Aıýpov, J.Áziretbergenov, T.Ábdiqaıymuly, B.Sadvahasov.
