Ordabasy aýdanyndaǵy «Halyqtyq keńse» jańa júıemen tolyqty

TÚRKІSTAN. QazAqparat – Túrkistan oblysy, Ordabasy aýdanynda ashylǵan «Halyqtyq keńse» jańa júıemen jumys júrgizedi. Bul jóninde aýdan ákimi Nurbol Turashbekov servıstik ákimdik keńsesiniń ashylýynda málim etti, dep habarlaıdy QazAqparat tilshisi.

Nurbol Turashbekovtyń sózinshe, «AIKEY» júıesi turǵyndar tarapynan túsken ótinishterdi baǵdarlama arqyly tıisti bólimderge joldaıdy. Ári merzimin belgileıdi. Aryz-shaǵymdarǵa jaýap berý deńgeıine baǵdarlama saraptama jasap, bólim basshylary men aýyl okrýgi ákimderiniń reıtıngisin túzedi. Turǵyndar tarapynan jazylǵan ótinishterdiń qaralý satysy men ony zerdeleıtin mamandy da osy baǵdarlama arqyly baqylap otyrýǵa múmkindikteri bar. QR Sybaılas jemqorlyqqa qarsy is-qımyl agenttigi Túrkistan oblysy boıynsha departament basshysynyń birinshi orynbasary Qarǵabaı Mıras búgin osy jańa júıeniń jumysymen tanysyp, «Ashyq ákimdik» qaǵıdasynda jumys júrgizý úshin bul eń ońtaıly nusqa ekenin atap ótti. Qazirgi tańda «Halyqtyq keńsege» ótinishpen kelgen aýdan turǵyndaryna Ordabasy aýdany ákimdigine qarasty 8 derbes bólim qyzmet kórsetedi. Jalpy 74 memlekettik qyzmet túri boıynsha 8 maman keńes berip, ótinish-tilekterin qabyldaıdy. Sonymen qatar, «Servıstik ákimdik» te «Halyqtyq keńsede» ornalastyryldy. Servıstik ákimdikte halyqtyń ótinishterin qabyldaý boıynsha 2 operator jumys isteıdi.

Aıta keteıik, «Halyqtyq keńse» elimizdiń Bas prokýratýrasynyń bastamasymen oblystyq prokýratýranyń, oblys ákimdiginiń qoldaýymen júzege asyrǵan joba. Jobanyń maqsaty - azamattardyń memlekettik jáne quqyq qorǵaý organdaryna degen senimin arttyrý, olardyń máselelerin tıimdi sheshý, sapaly quqyqtyq qyzmetke «bir tereze» qaǵıdasy boıynsha qol jetkizý bolmaq. Prokýratýra, ishki ister, ádilet organdarynyń, oblys ákimdigi qyzmetkerleriniń, sondaı-aq qorǵaýshylar men medıatorlardyń keńesterin alýǵa múmkindikteri bar.