Ordabasy aýdanyndaǵy eldi mekenderde kóshpeli májilister ótýde
ORDABASY. QazAqparat – Túrkistan oblysyna qarasty Ordabasy aýdanynyń ákimi Álipbek Óserbaev bastaǵan jumysshy top ár aýylda kóshpeli májilis ótkizýde. Aýdan basshysy tóraǵalyq etetin jıynda aýyldardaǵy máseleler jan-jaqty saraptalyp, olardy sheshý barysy talqylanýda, dep habarlaıdy QazAqparat tilshisi.
Aýdan aktıviniń kóshpeli májilisi Shubar aýylynda ótti. Jıynda aýdan ákimi Álipbek Óserbaev atqarylǵan jumysqa emes, ózekti máselelerge tereńirek toqtaldy. Al, Shubar aýyldyq okrýginiń ákimi Seıitqul Qydyrbaı kásipkerlik, aýylsharýashylyq, bilim salasyndaǵy ózgeristerdi baıandady.
«Bitken tirlik kópshiliktiń kóz aldynda. Biz túıtkildi máselelerdiń túıinin tarqatý joldaryn qarastyrý úshin bas qosyp otyrmyz», - degen aýdan basshysy veterınarııa salasynyń jumysyna kóńili tolmaıtynyn jetkizdi. Oǵan sebep - aýyldaǵy mal aýrýlarynyń ósýi. Sondaı-aq, taza aýyz sýmen qamtýda kezikken qıyndyqtar talqylanyp, usynystar tyńdaldy. Aýylsharýashylyq maqsatyndaǵy jerlerdi tıimdi paıdalaný jaıy da nazardan tys qalmady.
Aýdan ákimi Toqsansaı aýylyndaǵy eski FAP pen Á.Moldaǵulova atyndaǵy mekteptiń eski ǵımarattaryn tıimdi paıdalaný kerektigin atap ótti. Aýyl okrýgi ákimshiliginiń jumysyn zerdeleı kele, kemshilikterge jol bergen mamandarǵa tıisti shara kórýdi tapsyrdy.
Al, Badam aýyldyq okrýgindegi 6 aýyldyń beseýi taza aýyz sýmen qamtylǵan. Qarabastaý aýylyna taza aýyz sý júıesin tartý úshin búginde jobalaý-smetalyq qujattary ázirlený ústinde. «Orda» móltekaýdanyna ınfraqurylym júrgizýge de JSQ ázirlenip otyr.
Aýdan basshysy aýyl okrýgindegi veterınarııa, jer, salyq ınspektorlarynyń jumystaryn synǵa aldy. Sonymen qatar, ózekti máselelerdi sheshý boıynsha orynbasarlary men tıisti bólim basshylaryna naqty tapsyrmalar júktedi.
