Ordabasy aýdanynda turǵyndarǵa 60 myńnan asa maska tegin taratyldy

ORDABASY. QazAqparat – Túrkistan oblysy Ordabasy aýdanynda jergilikti turǵyndar men kitaphanashylar, eriktiler betperde tigýdi qolǵa aldy. Jumylyp jumys isteýdiń arqasynda turǵyndarǵa 60 myńnan asa betperde tegin taratyldy, dep habarlaıdy QazAqparat tilshisi.

Qaýipti indettiń órshýine baılanysty óńirde medıtsınalyq maskaǵa suranys artqany belgili. Osy rette aýdanda jańadan qolǵa alynǵan qorda 31 myńnan astam betperde jınaqtalǵan.

Sonymen qatar, aýdan boıynsha áleýmettik az qamtylǵan 105 otbasyǵa bir aılyq áleýmettik mańyzy bar azyq-túlik qory taratylyp berilgen. Oǵan jergilikti halyq qalaýlylary men kásipkerler demeýshilik jasady.

Aýdan boıynsha koronavırýs dertine baılanysty 5 baǵytta táýlik boıy jumys isteıtin 5 sanıtarlyq beket ornatylyp, onda polıtsııa men densaýlyq saqtaý mamandary táýlik boıy tekserýde.

Olar árbir kólikti toqtatyp, arnaıy qurylǵymen azamattardy qatań tekseristen ótkizedi. Jergilikti ákimdik tarapynan ystyq tamaq ta uıymdastyrylǵan.