Ordabasy aýdanynda tórt túlik mal sany jarty mıllıonnan asty

ORDABASY. QazAqparat - Túrkistan oblysy Ordabasy aýdanynda 2016-2020 jyldarǵa arnalǵan damý baǵdarlamasyna sáıkes, mal sharýashylyǵy salasyn damytý jospary júıeli túrde oryndalyp keledi, dep habarlaıdy QazAqparat Túrkistan oblysynyń Óńirlik kommýnıkatsııalar qyzmetine silteme jasap.

Máselen, «Sybaǵa» baǵdarlamasy boıynsha 327 iri qara mal alyndy. «Altyn asyq» baǵdarlamasy boıynsha 4089 mal alynyp, 190,7 paıyzǵa oryndaldy. Al, «Qulan» baǵdarlamasy boıynsha alynǵan jylqy sany 97 bas.

Nátıjesinde aýdanda jalpy tórt túliktiń sany 520 myńǵa jýyqtaǵan. Onyń 73,3 myńy iri qara, 420,4 myńy qoı men eshki, 25,4 myńy jylqy, 740-y túıe. Al, qustardyń jalpy sany 423,9 myńǵa jetken. Sáıkesinshe kásipkerler mal sharýashylyǵy ónimderin molynan alyp, naryqqa shyǵarýda. Búginge deıin aýdanda 13 311,8 tonna et, 33 004,9 tonna sút, 7 263,8 myń dana jumyrtqa óndirilgen.

Aıta keteıik, Ordabasy aýdanynda mal tuqymyn asyldandyrýmen aınalysatyn 6 sharýa qojalyǵy bar. Al, jalpy mal bordaqylaý alańdarynyń sany 355 birlik, onyń 76-sy bıyl iske qosylǵan. Sondaı-aq, 84 sút fermasy jumys isteıdi. Ústimizdegi jyly 3 otbasylyq qus fermasyn ashý josparlansa, búginde 4-eýi iske qosylyp, jospar 133 paıyzǵa oryndaldy.