Ordabasy aýdanynda táýligine 120 myń qysh óndiretin zaýyt iske qosylady

ORDABASY. QazAqparat - Túrkistan oblysy, Ordabasy aýdanynda bıyl jeltoqsan aıynda «Indýstrıalandyrý kartasy» aıasynda 2 joba júzege asyrylady. Jańa jobaǵa sáıkes, táýligine 120 myń qysh óndiretin zaýyt salynbaq, dep habarlaıdy QazAqparat tilshisi.

Jańa ozyq tehnologııamen jabdyqtalǵan «Bokei» qysh zaýytynyń jobalyq quny 2 mlrd 600 mln teńgeni quraıdy. Kásiporynda 60-qa jýyq azamat jumyspen qamtylmaq. Atalǵan qysh zaýytynyń qýaty táýligine 120 myń dana bolmaq.

Aýdan ákimi Baǵlan Batyrshaevtyń aıtýynsha, taǵy bir jobaǵa sáıkes «Aleksandrovskıı sad» kókónis saqtaý qoımasy ashylady. Nysannyń jalpy quny 800 mln teńgeni quraıdy. Onda 15 adam jumyspen qamtylady dep josparlanyp otyr. Atalǵan qoıma aýdan sharýalarynyń ónimderin saqtaýǵa yńǵaıly oryn bolmaq.

«Aǵymdaǵy jyldyń 9 aıynda aýdanǵa 15 mlrd 296 mln teńge ınvestıtsııa tartylyp, 2020 jyldyń tıisti kezeńimen salystyrǵanda 2 mlrd 731 mln teńgege artty. Sonymen qatar, aýdan kóleminde jumys istep turǵan shaǵyn jáne orta kásipkerlik nysandarynyń sany 10 954. Olarda 16 669 adam jumyspen qamtylǵan. Óndiris salasynda jalpy 39 kásiporyn jumys júrgizýde. Esepti kezeńde osy kásiporyndarmen 1 mlrd 599 mln teńgeniń ónimi óndirilip, ótken jyldyń tıisti kezeńimen salystyrǵanda 353 mln teńgege artty», - dedi Baǵlan

Dánebekuly.

Aýdan ekonomıkasynyń jetekshi baǵyttarynyń biri aýyl sharýashylyǵy salasy ekeni belgili. Bul sala boıynga jalpy óniminiń kólemi 9 aıda 50 mlrd 372 mln teńgeni qurap, ótken jyldyń osy kezeńimen salystyrǵanda 14 mlrd 381 mln teńgege ulǵaıǵan.