Ordabasy aýdanynda saýyqtyrý týrızmin damytý kózdelip otyr

ORDABASY. QazAqparat - Densaýlyqqa paıdasy kól-kósir jer asty sýyn Ordabasy aýdanynda emdik maqsatta paıdalanyp, saýyqtyrý týrızmin damytý kózdelip otyr, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.

Baspasóz qyzmeti taratqan aqparattarǵa qaraǵanda, oblys ákimi Ómirzaq Shókeev Ordabasy aýdanynda qolǵa alynǵan jańa jobalardy qoldady. Bógen aýylyndaǵy dárigerlik ambýlatorııanyń eski ǵımaratyn jerasty mıneraldy sýyn tıimdi paıdalaný maqsatynda janǵa daýa, dertke shıpa izdegender úshin ońaltý-saýyqtyrý ortalyǵy retinde qoldaný kózdelýde. Eki qabatty ǵımarattyń jalpy aýmaǵy 14 myń sharshy metrdi quraıdy. Osylaısha aýdanda shıpaly tabıǵı mıneraldy sý kózderin paıdalaný isi damıdy.

Túrkistan oblysynyń ákimi Ómirzaq Shókeev jumys saparymen Ordabasy aýdanynda bolyp, birqatar nysandardy aralady. Oblys basshysy is-saparyn Shubarsý aýylyndaǵy kúrdeli jóndeýdi qajet etetin B.Nurlybekov atyndaǵy jalpy orta mekteptiń jaǵdaıymen tanysýdan bastady. Bilim berý nysany 2004 jyly iske qosylǵan. Qazirgi tańda munda 2 myńnan astam bala bilim alýda.

Ordabasy aýdany boıynsha jalpy 65 mektep bar. Oblystyq bıýdjet esebinen 6 mekteptiń qurylysy júrgizilýde.

Sapar barysynda oblys basshysy Shubarsý aýylyndaǵy jekemenshik emhananyń jumysymen tanysty. Aýysymyna 250 adam qabyldaýǵa qýatty medıtsınalyq mekemede 125 azamat turaqty jumyspen qamtylǵan. Aýdanda 51 densaýlyq saqtaý mekemesi bar.

Oblys ákimi eksportpen aınalysatyn jylyjaıda boldy. Eki gektarǵa qyzanaq, qııar ósirýmen aınalysatyn azamattar oblystyń ǵana emes, respýblıkanyń birqatar qalalaryn qamtıdy. Ordabasy aýdanynda jylyjaıdyń jalpy aýmaǵy 87 gektardy quraıdy, onyń 21 gektary óndiristik jylyjaı. 66 gektary fermerlik sharýashylyq. Shubarsý aýylynda byltyr 15 gektar jylyjaı aýmaǵy qurylyp, ótinish bergen azamattarǵa úlestirildi. Bıyl jylyjaı kólemin taǵy 20 gektarǵa arttyrý kózdelýde. Ótken jyly osy jylyjaılarda 10 myń tonnaǵa jýyq ónim óndirilgen.

Aýdan ákimi Nurbol Turashbekov oblys basshysyn Boraldaı sý qoımasynyń jobasymen tanystyrdy. Sýǵarmaly jerdiń kólemin ulǵaıtý, aǵyn sý máselesin sheshý maqsatynda Ordabasy aýdanynda júıeli jumys júrgizilýde. Aýdan aýmaǵynda jalpy uzyndyǵy 800 shaqyrymnan asatyn 87 kanal bar. Onyń 215 shaqyrymy ótken jyly kanal mehanıkalyq tazalaýdan ótti. Jumystar jalǵasýda. Nátıjesinde egistik alqaptardyń sýǵarylýy jaqsardy.