Ordabasy aýdanynda quny 1,4 mlrd teńgege 33 joba júzege asyrylady
TÚRKІSTAN. QazAqparat – Túrkistan oblysy Ordabasy aýdanynyń jalpy óńirlik ishki ónim kólemi 78 mlrd 285 mln teńgege jetken. Bul týraly Óńirlik kommýnıkatsııalar qyzmetiniń kóshpeli brıfınginde aýdan ákimi Nurbol Turashbekov málimdedi, dep habarlaıdy QazAqparat tilshisi.
Aýdan ákiminiń aıtýynsha, byltyrǵy jyldyń tıisti kezeńimen salystyrǵanda 10,3 paıyzǵa artqan. Ónim kólemin arttyrý maqsatynda mańyzdy jobalardy júzege asyrý úshin aýdanǵa jalpy 15 mlrd 912 mln teńge kóleminde ınvestıtsııa tartylǵan.
«Jalpy aýdanda 11 aıdyń qorytyndysy boıynsha irili-usaqty 35 kásiporyn jumys istep keledi. Qazirgi tańda, «Qarapaıym zattar ekonomıkasy» baǵdarlamasy aıasynda jalpy quny 1 mlrd. 399,3 mln teńge bolatyn 33 joba súıemeldenýde. Al, «Bıznes-Bastaý» baǵdarlamasyna boıynsha 227 azamat sertıfıkat alyp, jospar 100 paıyzǵa oryndaldy. Bir sózben aıtqanda aýdanda óndirý, óńdeý baǵytyndaǵy jáne jalpy kásipkerlik salasyndaǵy jumystar qarqyndy túrde júrgizilip keledi», – dedi N.Turashbekov.
Al, aýyl sharýashylyǵy salasyndaǵy ónim kólemi 46 mlrd 885 mln teńgege jetip, 102,9 paıyzdy eńsergen. Bıyl 65 774 gektar egistik jer ıegerilip, jospar artyǵymen oryndalǵan.
«Aýdandaǵy jalpy jylyjaı kólemi 82,02 gektarǵa jetken. Olardan 4 370 tonna qııar, 2 420 tonna qyzanaq alyndy. Egistik jerlerdi tıimdi paıdalaný maqsatynda 171,9 gektar jerden eki ret ónim alynýda. Osy jyly aýyl sharýashylyǵy salasynda 5 mlrd 255 mln teńge ınvestıtsııa tartyldy. Bul byltyrǵy jyldyń tıisti kezeńimen salystyrǵanda 1,5 esege artyp otyr. «Sybaǵa» baǵdarlamasy boıynsha 665 iri qara mal alynyp, tapsyrma 138,8 paıyzǵa, «Altyn asyq»baǵdarlamasy boıynsha 4089 mal alynyp, tapsyrma 190,7 paıyzǵa, «Qulan» baǵdarlamasy boıynsha 289 bas jylqy alynyp, jospar 104,3 paıyzǵa oryndaldy», - dedi N.Turashbekov.
Aıta keteıik, aýdanda 379 mal bordaqylaý alańy jumys istep keledi. Onyń 100-i bıyl iske qosylǵan.
