Ordabasy aýdanynda qoıshy ózine senip tapsyrylǵan 230-dan astam maldy satyp jibergen
TÚRKІSTAN. QazAqparat – Ordabasy aýdanynda qoıshy ózine senip tapsyrylǵan maldy 16 mln teńgege satyp jibergen. Bul týraly Túrkistan oblysy Polıtsııa departamentinen málim etti, dep habarlaıdy QazAqparat.
Departament taratqan málimetterge qaraǵanda, Ordabasy aýdandyq polıtsııa bólimine jergilikti turǵyn aryzdanǵan. Er adamnyń aıtýynsha, ol ózi basqaryp otyrǵan jaıylymdyq jerdegi qoıshyǵa asyl tuqymdy maldaryn senip tapsyrǵan.
Alaıda, mal basyn túgendeýge barǵanda, olardyń tolyq emes ekendigin baıqaǵan. Osylaısha jábirlenýshige kelgen shyǵyn kólemi 16 380 000 teńge.
Atalǵan jaıtty polıtsııa qyzmetkerleri QR QK-niń 189-baby «Senip tapsyrylǵan bóten múlikti ıemdenip alý nemese talan-tarajǵa salý» boıynsha tirkeýge aldy.
Habar kelip túsken boıda tártip saqshylary oqıǵa ornyna shuǵyl shyqty. Polıtsııa atalmysh qylmysqa kúdikti retinde jábirlenýshiniń qoı baǵyp júrgen jumysshysyn ustady. Ol Arys aýdanynyń turǵyny bolyp shyqty.
Anyqtalǵandaı, sezikti er adam 2021 jyldan beri 230-dan astam usaq maldy 4-5-eýden satyp otyrǵan, aqshasyn jaratyp jibergen. Qazirgi tańda kúdikti qamaýǵa alynyp, oǵan qatysty sotqa deıingi tergeý amaldary júrgizilýde.
Polıtsııa qyzmetkerleri oqıǵanyń tolyq mán-jaıyn anyqtaýǵa kiristi.
«Túrkistan oblysynyń polıtseıleri turǵyndarǵa maldaryn beıtanys adamdarǵa baqtyrmaýǵa keńes beredi. Sondaı-aq, múmkindiginshe maldy tańbalap, syrǵalap, en saldyrý kerek»,-delingen habarlamada.
