Ordabasy aýdanynda Qajymuqan Muńaıtpasuly atyndaǵy sport kesheni salynady
ORDABASY. QazAqparat - Túrkistan oblysy, Ordabasy aýdanynda Qajymuqan Muńaıtpasulynyń 150 jyldyǵyna oraı qazaq dalasy batyrynyń atyna memorıaldyq keshen salynatyn boldy. Zamanaýı úlgide boı kóteretin nysannyń qurylys jumystary ústimizdegi jyldyń qarasha aıynda bastalmaq, dep habarlaıdy QazAqparat tilshisi.
Aýdan ákimdiginiń málimetinshe, atalǵan nysan 2021 jyldyń qazan aıynda paıdalanýǵa beriledi dep josparlanǵan.
«Batys Qytaı – Batys Eýropa» halyqaralyq kólik dálizi boıynda salynatyn memorıaldyq keshenniń jalpy aýmaǵy 5 gektardy quraıdy. Onda kitaphana, kórme zaly, qonaq úı, ashana, konferents zaly, sport zaly, sportshylardyń kıim aýystyrýǵa, jýynýǵa arnalǵan jáne basqa da qajetti bólmelermen qamtylmaq. Ǵımarattyń aýmaǵy jasyl-jelekpen abattandyrylyp, oryndyqtar men jaryqshamdar ornatylady. Sondaı-aq, jobada balalarǵa arnalǵan oıyn alańshasy men avtoturaq ta qarastyrylǵan.
Aıta keteıik, sporttyń birneshe túrimen shuǵyldanýǵa laıyqty keshen túrli deńgeıdegi jarystardy ótkizýge de yńǵaıly bolmaq.
