Ordabasy aýdanynda qatty daýyl úılerdiń shatyryn ushyryp, aǵashtardy qulatty
ORDABASY. QazAqparat – Túrkistan oblysyna qarasty Ordabasy aýdanynda qatty daýyl turyp, úıler men qoralardyń shatyryn ushyryp ketken. Aqqoıly aýylynda tabıǵı apattan 17 úıge shyǵyn kelgen, dep habarlaıdy QazAqparat tilshisi.
Aýyl turǵyndar bolsa 2 mamyr kúni túste aspanda bult úıirilip, alyp quıyn paıda bolǵanyn aıtady. Artynsha daýyl turyp, bar bolǵany 5-10 mınýt aralyǵynda jan-jaqty qıratyp ketken. Tipti jeldiń ekpini qatty bolǵany sonshalyq, aǵashtar tamyrymen opyrylyp qulaǵan. Elektr baǵanalary qulap, symdary úzilgen. Jergilikti halyq tabıǵattyń tosyn minezinen qatty qorqyp, bas saýǵalap ketken. 60 otbasy turatyn aıadaı ǵana aýylda 17 úıdiń shatyry qırap, turǵyndar shyǵynǵa batqan. Olar bul kórnisti uıaly telefondaryna túsirip, áleýmettik jelilerge taratqan. Al, oblystyq TJD mamandary jeldiń ekpini sekýndyna 20 metrge deıin jetken dep otyr.
«TJD basqarý pýltine shamamen 15:00-de Aqqoıly eldimekeninde qatty jel saldarynan 17 úıiń shatyryn ushyryp áketkeni týraly habarlama kelip tústi. 420 turǵyny bar aýylda 3 elektr baǵanasy qulap, jergilikti halyq jaryqsyz qalǵan. Oqıǵa saldarynan eshkim zardap shekpegen. Qazirgi tańda «Ońtústik jaryq» JShS qalpyna keltirý men jaryq berý jumystaryn júrgizýde» delingen habarlamada.
Sondaı-aq, qazirgi tańda atalǵan aýdanda osy oqıǵaǵa baılanysty arnaıy shtab qurylǵan. Onda komıssııa músheleri tabıǵı apatttan keltirilgen shyǵyn kólemin esepteýde.
