Ordabasy aýdanynda Arys-Shymkent baǵytyndaǵy kópirdi sý shaıyp ketti
ORDABASY. QazAqparat – Túrkistan oblysy, Ordabasy aýdany aýmaǵynda Arys-Shymkent baǵytyndaǵy kópirdi sý shaıyp ketti. Bul týraly Arys qalasynyń ákimdigi resmı túrde habarlap, júrgizýshilerge bul joldyń jabylǵanyn eskertti, dep habarlaıdy QazAqparat tilshisi.
«Arys qalasy men kórshiles Ordabasy aýdany Qaraspan (Obrýchevka) aýylyndaǵy Badam ózeniniń ústinen salynǵan ýaqytsha kópirdi sý basty. Arys-Shymkent baǵytyndaǵy joldyń ústindegi kópirdi sý basýynan barlyq kólik qozǵalysy shekteldi. Atalǵan sebepterge baılanysty Arys-Shymkent baǵytyndaǵy kólikterdiń ótý múmkindigi joq ekendigin nazarlaryńyzǵa jetkizemiz. Shymkent qalasyna shuǵyl túrde baratyn arnaıy ruqsaty bar kólik júrgizýshileriniń nazaryna, Montaıtas-Badam-Shymkent baǵytymen júrý usynylady», delingen Arys qalasy ákiminiń habarlamasynda.
Aıta keteıik, kúni keshe qatty nóser jaýynnan Qasqasý ózeni arnasynan asyp ketken bolatyn. Saldarynan Tólebı aýdanyndaǵy 4 kópirdi de sý shaıyp, Joǵary Qasqasý aýylynyń ishki joldary jabylyp qalǵan edi.
