Ordabasy aýdanynda 43 mlrd teńgeden astam aýyl sharýashylyǵy ónimderi óndirilgen
ORDABASY. QazAqparat - Túrkistan oblysy Ordabasy aýdanynda aýylsharýashylyǵy salasyndaǵy ónimniń tabysy bıyl 43 mlrd. 175 mln. teńgeni qurady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Byltyrǵy jyldyń osy kezeńimen salystyrǵanda 5 mlrd. 371 myń teńgege artty. Oǵan qosa on aı ishinde aýdannyń aýyl sharýashylyǵyna 5 mıllıard teńgeden astam ınvestıtsııa salynǵan. Bul ótken jylǵa qaraǵanda 1,6 esege kóp.
Egistik jerlerdi tıimdi paıdalaný maqsatynda eki ónim alý jobasymen aýdan boıynsha 90 sharýashylyq aınalysýda. 83 sharýashylyqtyń 169 gektardan alǵan alǵashqy ónimi 4031,2 tonnany quraǵan. Dıqandar 126,8 gektardan ekinshi ret ónim jınap, qambalaryn 1 658,9 tonna ónimmen tolyqtyrǵan.
Keńinen qoldanys tapqan tamshylatyp sýarý ádisi 628 gektar jerge engizilip, jospar 104 % oryndaldy. Aýdan halqyn jemis-jıdekpen tolyq qamtý maqsatynda jalpy 319 gektar jerge kópjyldyq qarqyndy ekpeler ornalastyrylǵan.
Erekshe kásipti ıgergen «BS-Agro Product» JShS-gi jańa ınnovatsııany qoldaný arqyly 60 gektarǵa sýǵarýsyz ádisimen «Sitrullus Lanatus (Malali)» surypty qarbyz kóshetin otyrǵyzyp, búgingi tańǵa 6,6 tonna qarbyz dánin jınap aldy. Dál osy tásilmen egilgen qarbyzdyń dáni sheteldik kosmetologııa salasynda úlken suranysqa ıe bolyp otyr. Seriktestik jınalǵan ónimdi Izraıl memleketine eksporttaýdy josparlaýda.
Dıqandar memleket tarapynan da barynsha qoldaý taýyp keledi. Kóktemgi jáne kúzgi dala jumystaryn júrgizýge aýdandaǵy aýyl sharýashylyǵy taýarlaryn óndirýshilerge 6 110 tonna jeńildetilgen baǵada janar maı bólingen. Sonymen qatar, topyraqtyń qunarlylyǵy men aýyl shaýashylyǵy daqyldarynyń ónimi men sapasyn arttyrý úshin 4 200 tonna mıneraldy tyńaıtqyshtar úlestirilgen.
Ordabasy aýdany boıynsha kókónis pen astyq saqtaýǵa arnalǵan jalpy syıymdylyǵy 38 myń tonnadan astam 16 qoıma bar. Jyl sońyna deıin Badam aýyl okrýginen qosymsha zamanaýı qoımany eske qosý kózdelýde.
