Ordabasyda oqýshy qyzdy óltirip, denesin sýǵa aǵyzyp jiberdi degen eki jigittiń soty bastaldy

Túrkistan oblysynda oqýshy qyzdy bopsalap, keıinnen pyshaqtap óltirgen eki kúdiktige 3 bap boıynsha aıyp taǵylyp otyr, dep habarlaıdy QazAqparat tilshisi.

Oqıǵa bıylǵy jyldyń basynda Ordabasy aýdanyndaǵy Tórtkúl aýylynda bolǵan.

9-synyp oqýshysyn bir mektepte oqıtyn 11-synyp oqýshysy men 19 jastaǵy aýyldasy bopsalap, aqsha suraǵan.

«Bir mıllıon teńge bermeseń, jalańash fotońdy jelige jarııalaımyz» dep qorqytqan. Al, keıinnen qyzdy pyshaqtap, denesin sýǵa aǵyzyp jibergen.

Keshegi aptada qoǵamnyń nazaryn aýdarǵan oqıǵaǵa qatysty sot otyrysy bastaldy.

«Túrkistan oblystyq sotyna oqýshy qyzdy óltirgen eki kúdiktige qatysty is materıaldary 1 qyrkúıek kúni kelip tústi. 2004 jáne 2005 jyly týǵan kúdiktilerge qatysty Qylmystyq kodekstiń 132-babynyń 4-bóligimen, 194-babynyń 2-bóligi 2-tarmaǵymen jáne 99-babynyń 2-bóliginiń 7,9,14 tarmaqtary boıynsha aıyp taǵylyp otyr. Іs materıaldary Túrkistan oblysynyń qylmystyq isteri jónindegi mamandandyrylǵan aýdanaralyq sotynyń sýdıasy Sáken Yntyqpaıuly Turǵymbaevtyń óndirisine qabyldanǵan. Qazirgi tańda aldyn ala tyńdaý júrip jatyr» delingen Túrkistan oblystyq sotynyń baspasóz qyzmeti usynǵan aqparatta.