«Ordabasy» men «Aqtóbe» matchynda jeńimpaz anyqtalǵan joq
ASTANA. KAZINFORM - Búgin fýtboldan Premer-lıga komandalary arasyndaǵy el birinshiligi 18-týryndaǵy «Ordabasy» men «Aqtóbe» kezdesýinde jeńimpaz anyqtalǵan joq.
Týrnır kestesinde komandalar aldyńǵy oryndarda keledi. Bas júldege úmitker ujymdar retinde olardyń ózara kezdesýi jankúıerler tarapynan erekshe qyzyǵýshylyq týǵyzady.
Jeńiske jetken klýbtyń chempıondyq ataqqa múmkindigi arta túsetin edi.
Kezdesý barysynda qos komanda tarapynan tolassyz shabýyl órbidi.
«Aqtóbe» tarapynan Sevalos Enrıkes Hose 14-mınýtta mergendik tanytsa, oǵan shymkenttik klýbtan Shahboz Ýmarov 73-mınýtta bir golmen jaýap qaıyrdy.
Osylaısha komandalar 1:1 esebine qanaǵat bildirip tarqasty.
Endi aldaǵy týrda «Ordabasy» 31 tamyzda Qyzylordada «Qaısarmen» kezdesse, sol kúni «Aqtóbe» óz alańynda «Elimaıdy» qabyldaıdy.
Atalǵan týrdyń alǵashqy oıyn kúni, 24 tamyzda «Atyraý» Qaraǵandynyń «Shahterin» 1:0, Semeıdiń «Elimaıy» Petropavldyń «Qyzyljaryn» 2:1 esebimen jeńse, «Qaısar» (Qyzylorda) men «Jetisý» (Taldyqorǵan) 0:0 esebimen teń tarqasty.
Sondaı-aq búgin, 25 tamyzda «Qaırat» pen «Tobyl» 2:2 esebine qanaǵat bildirdi.
